«ԱՄՆ Հազարամյակի մարտահրավերներ» կորպորացիայի (ՀՄԿ) գլխավոր գործադիր տնօրեն Դանիել Յոհանեսը Հայաստան կատարած եռօրյա այցի երկրորդ օրն այցելեց Արմավիրի մարզի Ծաղկունք գյուղի երրորդ կարգի ջրանցք, որի 2 կմ-անոց հատվածը վերականգնվել է ՀՄՀ-Հայաստանի կողմից:

Դ. Յոհանեսը եղավ նաեւ Էջմիածնի «Կոնսեր» պահածոների գործարանում: «Կոնսերը» ՀՄՀ-Հայաստան ծրագրի Ջրից դեպի շուկա բաղադրիչի «Վերամշակում եւ մարքեթինգ» ենթաբաղադրիչի շրջանակներում ֆինանսական աջակցություն ստացած 225 ձեռնրկություններից մեկն է:

Դանիել Յոհանեսը գործարանի բակում պատասխանեց նաեւ լրագրողների հարցերին: Նա ասաց, որ ինքը Հայաստան է եկել, որպեսզի տեղում տեսնի ծրագրի առաջընթացը, որը եղել է անցնող 5 տարիների ընթացքում: Ըստ նրա՝ հաջողություններն ակընհայտ են, եւ Հայաստանի կառավարությունը, ժողովուրդը պետք է ամեն ինչ անեն, որ ձեռք բերված հաջողություններն ու ներդրումները լինեն կայուն: «Իսկ դուք պետք է գոհ լինեք, քանի որ այս առաջադիմությունը բավականին կայուն է եղել»,- դիմելով հավաքվածներին՝ ասաց Դ. Յոհանեսը:

«ՀՄՀ-Հայաստան» ծրագրի ավարտին` 2011թ. սեպտեմբերի 30-ին, «Հազարամյակի մարտահրավեր» կորպորացիայի ներդրումը  Հայաստանի գյուղատնտեսության եւ ոռոգման համակարգերում  կկազմի շուրջ 180 մլն ԱՄՆ դոլոր, ինչից Դանիել Յոհանեսը գոհ է: Նա ասաց, որ կորպորացիան այս պահին աշխատում է 22 երկրների հետ, որոնց ընտրությունը կատարվում է մրցակցային սկզբունքով:

«Կան երկրներ, որտեղ նվիրված են իրենց ժողովրդին եւ տնտեսությանը ազատություն են տալիս: Նախընտրում ենք այդ երկրների հետ աշխատել»,-ավելացրեց Դ. Յոհանեսը:

Լրագրողները հետաքրքրվեցին, արդյոք կորպորացիան Հայաստանի կառավարության առջեւ որոշակի պահանջներ դրե՞լ է ծրագիրը շարունակական դարձնելու համար: Գլխավոր գործադիր տնօրենը կոնկրետ պատասխան չտվեց, միայն նշեց, որ բոլոր երկրների առջեւ նույն պահանջներն են դրված եւ կառվարությունները լավ գիտեն, թե ինչ պետք է անեն:

«Այդ խնդիրները հիմնականում կապված են կոռուպցիայի եւ կառավարչության հետ»,- ավելացրեց նա:

«Հետքը» Դ. Յոհանեսին հարցրեց՝ արդյոք հնարավո՞ր է, որ Հայաստանում ծրագիրը շարունակվի` հաշվի առնելով, որ ընդդիմությունը որոշակի խնդիրների լուծման համար փորձում է համագործակցության եզեր գտնել իշխանությունների հետ: Դանիել Յոհանեսը հարցը լսեց, հետաքրքրվեց, թե որ լրատվամիջոցն եմ ներկայացնում, ապա ասաց. «Կներեք, բայց այլեւս հարցերի չեմ պատասխանում»: