Կառավարությունն այսօրվա նիստին որոշեց Ֆրանկոֆոնիայի գագաթնաժողովի անցկացման համար հինգշաբթի-ուրբաթ աշխատանքային օրերը տեղափոխել հոկտեմբերի 27 և նոյեմբերի 3` շաբաթ օրեր:

Նախապես փոխվարչապետ Տիգրան Ավինյանի ներկայացված նախագծով՝ հոկետեմբեր 11-ի աշխատանքային օրը նախատեսված էր տեղափոխել հոկտեմբերի 20: Սակայն կրթության և գիտության նախարար Արայիկ Հարությունյանը կառավարությանն առաջարկեց աշխատանքային օրերը տեղափոխել հոկտեմբերի 27 և նոյեմբերի 3: Նախարարը նշեց, որ հոկտեմբերի 21-ին հանրապետության մի շարք համայնքներում ՏԻՄ ընտրություններ են, և հոկտեմբերի 20-ին հանձնաժողովները պետք է նիստեր գումարեն՝ ընտրություններին նախապատրաստվելու համար:

Վարչապետը ևս համաձայնեց Արայիկ Հարությունյանի այս առաջարկությանը, կառավարության անդամները առարկություն չունեցան։ «Կարծում եմ` ընդունելի առաջարկ է»,- նշեց Նիկոլ Փաշինյանը։