Հետախուզման մեջ գտնվող Ազատամուտի համայնքապետ Ժորա Մարտիրոսյանին ոստիկանները հայտնաբերել են Երևանի հիվանդանոցներից մեկում: Ոստիկաններն այդ մասին տեղեկացրել են քննիչներին, ովքեր եկել են հիվանդանոց և Մարտիրոսյանին մեղադրանք առաջադրել: Նրա նկատմամբ խափանման միջոց է ընտրվել ստորագրություն երկրից չհեռանալու մասին:

Այս մասին «Հետք»-ին հայտնեց Գլխավոր դատախազության հանրային կապերի բաժնի պետ Արևիկ Խաչատրյանը:

Ժորա Մարտիրոսյանին մեղադրանք է առաջադրվել Քրեական օրենսգրքի 323-րդ հոդվածի 1-ին մասով՝ ինքնիրավչություն կատարելու համար: Այն նախատեսում է նվազագույն աշխատավարձի երեքհարյուրապատիկից հինգհարյուրապատիկի չափով տուգանք կամ կալանք՝ 1-3 ամիս ժամկետով:

Հիշեցնենք, որ Տավուշի մարզային դատախազը հոկտեմբերի 5-ին իր վարույթում քննվող քրեական գործում Մարտիրոսյանին ներգրավել է որպես մեղադրյալ, նրա նկատմամբ ընտրվել է ստորագրություն երկրից չհեռանալու մասին խափանման միջոց, իսկ արդեն երեկ դատախազը համայնքապետի նկատմամբ հետախուզում է հայտարարել: