Երևան քաղաքի ընդհանուր իրավասության դատարանը, նախագահությամբ դատավոր Աննա Դանիբեկյանի,  այսօր հետաձգեց  Նուբարաշենի խճուղում տեղի ունեցած սպանության գործով դատական նիստը. վկաներից որևէ մեկը դատարան չէր ներկայացել:

Նրանցից  մեկին՝ Մարիամ Գրիգորյանին, դատարանը բերման ենթարկելու որոշում է կայացրել, սակայն առ այսօր որոշումը կատարել չի հաջողվել:

Նախորդ դատական նիստին դատավորը որոշել էր «Սեկտ» համակարգ  հարցում կատարել՝ Մարիամ Գրիգորյանի՝ Հայաստանից ելքի և մուտքի վերաբերյալ ինֆորմացիա ստանալու համար, սակայն մինչև այսօր  համակարգից պատասխան չի ստացվել:

Նշենք, որ Մարիամ Գրիգորյանն այս գործով առանցքային վկա է: Վերջինս, ըստ գործի նյութերի, եղել է այն անձանց հետ, որոնք մեղադրվում են Եղիշե Խաչատրյանի սպանության մեջ:

Փաստացի, Գրիգորյանը գործով միակ վկան է, ով, ենթադրաբար, ի սկզբանե ականատես է եղել Նուբարաշենի խճուղում տեղի ունեցած իրադարձություններին: Մյուս անձը, ով, ըստ գործի նյութերի, ի սկզբանե ներկա է եղել Եղիշե Խաչատրյանի հետ տեղի ունեցածին, վերջինիս մայրն է՝ Էմմա Աբրահամյանը, որը գործով տուժողի կարգավիճակ ունի:

Եղիշե Խաչատրյանը, հիշեցնենք, սպանվել է 2016թ. հուլիսի 4-ին: Գործով մեղադրվում է 5 անձ՝ Արտաշես Չիչոյանը, Արարատ Նիկողոսյանը, Խաչիկ Կոսյանը, Արթուր Զաքարյանն ու Յուրի Հակոբյանը: Վերջիններիս մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով (սպանություն մի խումբ անձանց կողմից խուլիգանական դրդումներով) և 258 հոդվածի 3-րդ մասի 1-ին և 4-րդ կետերով (խուլիգանություն, որը կատարվել է մի խումբ անձանց կողմից, զուգորդվել է անձի առողջությանը միջին ծանրության վնաս պատճառելով):

Ըստ մեղադրանքի` սպանված Եղիշե Խաչատրյանը երթևեկության կանոնները խախտելու համար նկատողություն է արել ամբաստանյալներ Յուրի Հակոբյանին, Արտաշես Չիչոյանին ու Արարատ Նիկողոսյանին, որից հետո վերջիններս նրան հայհոյել են, ծեծել, ապա դեպքի վայր են եկել Արթուր Զաքարյանը, Խաչիկ Կոսյանը և ինքնությունը չպարզված ևս մեկ անձ, ու ծեծկռտուքը շարունակվել է այնքան, մինչև Եղիշե Խաչատրյանը սպանվել է: Դեպքի ժամանակ Եղիշե Խաչատրյանի հետ մեքենայում է եղել նաև նրա մայրը՝ Էմմա Աբրահամյանը, և միջադեպը տեղի է ունեցել մոր աչքի առաջ: