Կառավարության արտահերթ նիստում վարչապետ Նիկոլ Փաշինյանը հայտարարեց «ոչ բռնի, թավշյա հեղափոխության» ավարտին հասցնելու մասին։

«Այսօր կարևոր օր է, պատմական փուլ էլ ենք շրջափակում, մենք պետք է ավարտին հասցնենք գարնանը սկսված ոչ բռնի թավշյա հեղափոխությունը, այդ մասին կոնկրետ հայտարարությամբ հանդես կգամ այսօր երեկոյան», - ասաց Փաշինյանը։

Հիշեցնենք, որ երեկ երեկոյան վարչապետի մամուլի քարտուղար Արման Եղոյանը «Հետք»-ի հետ զրույցում ասել էր, որ այսօր վարչապետ Նիկոլ Փաշինյանը հրաժարական է ներկայացնելու։

Հիշեցնենք, որ ըստ Սահմանադրության` վարչապետի կողմից հրաժարական ներկայացնելու դեպքում կառավարությունը հանրապետության նախագահին է ներկայացնում իր հրաժարականը, սակայն կառավարության անդամները շարունակում են իրենց պարտականությունների կատարումը մինչև նոր կառավարության կազմավորումը՝ ժամանակավոր պաշտոնակատարի կարգավիճակով։

Ըստ Սահմանադրության 149-րդ հոդվածի՝ վարչապետի պաշտոնը թափուր մնալու դեպքում յոթօրյա ժամկետում ԱԺ խմբակցությունները վարչապետի թեկնածուներ առաջադրելու իրավունք ունեն։ Վարչապետ չընտրվելու դեպքում քվեարկությունից յոթ օր հետո անցկացվում է վարչապետի նոր ընտրություն, որին մասնակցելու իրավունք ունեն պատգամավորների ընդհանուր թվի առնվազն մեկ երրորդի առաջադրած վարչապետի թեկնածուները: Եթե պատգամավորների ընդհանուր թվի ձայների մեծամասնությամբ վարչապետ չի ընտրվում, ապա Ազգային ժողովն արձակվում է իրավունքի ուժով:

Հիշեցնենք, որ «Բարգավաճ Հայաստան» կուսակցության նախագահ Գագիկ Ծառուկյանն ու Նիկոլ Փաշինյանը հուշագիր են ստորագրել, ըստ որի «Ծառուկյան դաշինք» խմբակցությունը որպես հեղափոխությանն աջակից ուժ պարտավորվում է վարչապետի թեկնածու չառաջադրել, չաջակցել վարչապետի որևէ թեկնածուի»։

Հայաստանի Հանրապետական խմբակցությունն էլ հայտարարել էր, որ չընդունելով դեկտեմբերին արտահերթ ընտրություններ անցկացնելու հիմնավորումները, ՀՀԿ-ն չուներ և չունի մտադրություն վարչապետի թեկնածու առաջադրելու։