Բիզնես Արմենիայի աջակցությամբ «Թաշչյան Գրուպ» ընկերությունը կոշիկների արտադրություն է սկսել և պատրաստվում է արտահանել առաջին խմբաքանակը։

Այս մասին տեղեկացնում է հիմնադրամի հանրային կապերի բաժինը։

Ամերիկահայ Քոլ Թաշչյանը գործարար ծրագիրը կազմել է Բիզնես Արմենիայում (նախկինում՝ Հայաստանի զարգացման հիմնադրամ) պրակտիկա անցնելու ժամանակաշրջանում, իսկ ծրագիրն իրականացրել է պրակտիկան ավարտելուց մեկուկես տարի անց։

Քոլ Թաշչյանը գործը սկսել է 60 000 դոլարի ներդրումով և հայաստանյան արտադրողներից մեկի հետ համագործակցությամբ։

Բիզնես Արմենիան (վերաբրենդավորված Հայաստանի զարգացման հիմնադրամը) ստեղծվել է ՀՀ կառավարության կողմից 2015 թ.՝ երկրի տնտեսական աճի խթանման հիմնական առաքելությամբ: Կառույցի գլխավոր նպատակն է Հայաստանի վարկանիշի և մրցունակության բարձրացումը, ներդրումների ներգրավումը, արտահանման խթանումը:

«Թաշչյան Գրուպ»-ի կոշիկները, ըստ հաղորդագրության, արտադրվում են էկոլոգիապես մաքուր նյութերից, ամբողջությամբ ձեռագործ են (տեսանյութ)։ Արդեն արտադրվել է 400 զույգ կոշիկ, խմբաքանակն առաջիկայում կարտահանվի ԱՄՆ, առցանց վաճառքն իրականացվում է Areni1.store հասցեով։