Այսօր համայնքապետի ընտրություն էր անցկացվում Լոռու մարզի Ձորագյուղ գյուղում:   Համայնքապետի պաշտոնի համար մրցակցում էին Գուգարքի անտառտնտեսության Ձորագյուղի անտառապահ Վահրամ Հովսեփյանը  և գյուղի հիմնական դպրոցի  պատմության ուսուցիչ, 27-ամյա Արշակ Ռամազյանը: Ժամը 12:00-ի դրությամբ ընտրացուցակում ընդգրկված Ձորագյուղի 260 ընտրողներից  ընտրությանը մասնակցել էր 29 ընտրող: «Առավոտ է, անասունի հետ մարդիկ աշխատում են, գործը վերջացնելուց հետո ընտրողների հոսքը կավելանա»,- բացատրեց հանձնաժողովի նախագահ Հովհաննես Հովհաննիսյանը: Ընտրությունն անցնում էր նորմալ, բողոքներ և խախտումներ չէին արձանագրվել: Ժամը 18:00-ին Ձորագյուղում ընտրության մասնակցել է 133 ընտրող:

Հովհաննես Հովհաննիսյանը

Ձորագյուղի ընտրատեղամասի տարածքը մեր այցելության պահին խաղաղ էր: Հերթապահում էին ոստիկանները: Ավտոմեքենաների և ընտրողների կուտակումներ չկային: Թեկնածուները զբաղված էին իրենց առօրյա կյանքով։ «Թավշյա հեղափոխությունից հետո սա մեր գյուղի առաջին ընտրությունն է»,- ասաց թեկնածու Արշակ Ռամազյանը:

Ձորագյուղում այսօր հանդիպեցինք համայնքապետի թեկնածուների հետ: «Բաներ կար, որ Ձորագյուղում դուրս չէր գալի: Ձորագյուղցիները հիմնականում անասնապահությամբ են զբաղվում, երկու տարի է սկսել են հող մշակել: Ես աջակցելու եմ, որ կաթի վերամշակման արտադրամաս կառուցվի Ձորագյուղում, որ գյուղացիները գոնե մի 20 դրամով ավել վաճառեն իրենց կաթը:  Հիմա մեկ լիտր կաթը վաճառում են 130 դրամով: Գյուղում լուսավորություն չկա: Գոնե մինչև ժամը 24:00-ն փողոցում լույս լինի: Խմելու ջրագծերի վթարների պատճառով ջրահոսքերը գյուղի ճանապարհները քանդում են: Մի սովորական քամուց էլեկտրասյուները ընկնում են, մենք էլ օրերով լույս չենք ենք ունենում»,- ասաց համայնքապետի թեկնածու Վահրամ Հովսեփյանը:

Արշակ Ռամազյանն ավարտել է Վանաձորի մանկավարժական համալսարանի պատմության ֆակուլտետը: «Ուզում եմ իմ գյուղի համար լավ բան կատարել: Ես մտածեցի, որ ժողովրդի աջակցությամբ կարող եմ գյուղը ոտքի կանգնեցնել: Չէի ասի, թե Ձորագյուղը ծայրահեղ վատ վիճակում է: Սակայն, եթե ամեն ընտրված գյուղապետ ինչ-որ լավ բան կատարի,  կարելի է գյուղը ավելի լավ տեսքի բերել»,- ասաց Արշակը: Վերջինս  Ձորագյուղի կարևոր խնդիրը համարում է գազիֆիկացումը: «Եթե համայնքի ղեկավար ընտրվեմ, պետք է ամեն ինչ անեմ գյուղացիներին հողին կապելու համար»,- ասաց նա: Արշակի խոսքով՝  Ձորագյուղի վարելահողերը Աստծո հույսին են: Գյուղը ոռոգման ջուր չունի, Արշակը որոշել է համայնքապետ ընտրվելուն պես զբաղվել այդ հարցով: «Ես առաջին հերթին  կբարելավեմ ձորագյուղցիների կենցաղային պայմանները: Մեր գյուղի լավ ավանդույթն այն է, որ գյուղացիները միմյանց նկատմամբ հոգատար են: Ես դա կարևոր արժեք եմ համարում»,- ասաց  թեկնածուն: Արշակը հարգանքով խոսեց իր մրցակցի նկատմամբ:  Ասաց՝ նրա ընտրվելու դեպքում անպայման շնորհավորելու է:

Արշակ Ռամազյանը

Ընտրող Լուսաշող Սիմոնյանը Ձորագյուղի կարևոր խնդիրը համարեց արտագաղթի կանխումը. «Ջահելությունը գյուղից հեռանում է աշխատանքի պատճառով»,- ասաց նա:  Բազմազավակ մայր Գայանե Խաչատրյանն այս անգամ համայնքապետի ճիշտ ընտրությունը բախտորոշ էր համարում իր ընտանիքի և մյուս ձորագյուղցիների համար. «Մեր գյուղում ապրելակերպ չկա: Ձորագյուղցիները գյուղից փախչում են:  Ձորագյուղում մեծահասակներն են մնում, մեկ էլ ով ճար չունի՝ նրանք: Ես բազմազավակ մայր եմ, 6 երեխա ունեմ, մեծ դժվարությամբ եմ պահում երեխաներիս: Գյուղում գրեթե բնակվող չկա,  լրիվ տները քանդվում են»,- ասաց  Գայանեն: Վերջինս կարծում է, որ գյուղը պետք է ընտրի համայնքապետի լավագույն թեկնածուին։