Այսօրվա ՏԻՄ ընտրություններին մասնակցել է ընտրելու իրավունք ունեցողների 43․28 %-ը կամ 217 708 ընտրողից 94 222-ը։

Սրանք կենտրոնական ընտրական հանձնաժողովի հրապարակած նախնական տվյալներն են։

Մասնակցության ամենաբարձր ցուցանիշը գրանցվել է Արարատի մարզի Լուսաշող համայնքում։ Այստեղ քվեարկության է մասնակցել ընտրողների 80․96 %-ը․ 415 ընտրողից 336-ը։ Իսկ քվեարկության ամենացածր ցուցանիշը արձանագրվել է Արագածոտնի մարզի Մեծաձոր համայնքում․ 8․89 տոկոս։

Ամենաթեժ պայքարող համայնքներում՝ Հրազդանում, Էջմիածինում, Կապանում և Արմավիրում քվեարկությունն այդքան էլ ակտիվ չի եղել։ Մյուս երեք քաղաքների համեմատ՝ Կապանում քվեարկության մասնակցությունը կարողացել է գերազանցել 50 տոկոսի շեմը․ այստեղ քվեարկության է գնացել ընտրողների 55 տոկոսը։

Հրազդանում, Էջմիածինում, Արմավիրում մասնակցության ցուցանիշը տատանվել է 34-36 %-ի շրջակայքում։

Հիշեցնենք՝ այսօր տեղական ինքնակառավարման մարմինների ընտրություններ են անցկացվում Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Սյունիքի և Տավուշի մարզերի թվով 49 համայնքներում, որոնցից 25-ում` արտահերթ: 

Այդ համայնքներից 42-ում ընթանում են միայն համայնքի ղեկավարի, 6 համայնքում` միայն ավագանու անդամի, և մեկ համայնքում միաժամանակ ընթանում են համայնքի ղեկավարի և ավագանու անդամի ընտրություններ: