Համաներման ակտի քննարկման ժամանակ ԱԺ պատգամավոր Ալիկ Սարգսյանը նկատեց, որ համաներումը մարդասիրական երևույթ է, համամիտ է, որ այն լինի, սակայն կառավարության ուշադրությունը հրավիրեց մեկ այլ խնդրի վրա:

«Կուզենայի անդրադառնաք մի երևույթի՝ ընդունենք մարդիկ դուրս եկան կալանավայրերից համաներման արդյունքում, իսկ մեր տուժողների նյութական և բարոյական վնասի հատուցման խնդիրը ինչպե՞ս եք տեսնում, և ի՞նչ մասնակցություն  կարող է ունենալ պետությունն այս գործում», - հետաքրքրվեց պատգամավորը՝ դիմելով արդարադատության նախարարի պաշտոնակատար Արտակ Զեյնալյանին:

Արտալ Զեյնալյանն արձագանքեց՝ այդ խնդրի մասին ևս մտածել են։

«Քրեական գործով կայացված դատավճռով, երբ հաստատվում է վնասի առկայությունը, եթե բացակայում է քաղաքացիական հայցը, ԴԱՀԿ-ի կողմից այն կատարման ենթակա չէ,  եթե դնում ենք այդ նախապայմանը, որ անձը քանի դեռ չի հատուցել վնասը, նա ազատ չի արձակվում, ստացվում է վնասի հատուցումը փրկագին է: Մենք նախատեսել ենք մի ընթացակարգ, որը թույլ է տալիս այդ  պրոցեսում ներգրավել ԴԱՀԿ ինստիտուտը, որպեսզի քաղաքացիական հայց լինի, լինի կատարողական թերթ ու այն հնարավոր լինի կատարել», - ասաց նա:

Նախարարի պաշտոնակատարը վստահեցրեց՝ փորձել են հավասարակշռել, որ և տուժածներին հնարավորություն տրվի գործնականում ստանալ վնասների հատուցումը, և անձինք, ովքեր վնաս են տվել, դուրս գան ՔԿՀ-ից և հնարավորություն ունենան միջոցներ վաստակել հատուցած վնասը փոխհատուցելու համար: Զեյնալյանի խոսքով՝ մինչ այժմ եղել է այնպես, որ անձը պատժից կազատվի, եթե հատուցի վնասը: