Համայնքներին լրացուցիչ 167 մլն դրամ սուբվենցիա կտրամադրվի
Համայնքներին այս տարվա պետական բյուջեով նախատեսված սուբվենցիաներից բացի կառավարությունը այսօրվա նիստին որոշեց հատկացնել լրացուցիչ 167 միլիոն դրամ:
Ինչպես գրված է գործադիր ներկայացված որոշման նախագծում, 2018 թվականի առաջին 9 ամիսներին համայնքների կողմից ներկայացվել են ծրագրային հայտեր, որոնց իրականացման համար անհրաժեշտ է եղել լրացուցիչ գումար: Դրանք հիմնականում ուղղված են համայնքներում կապիտալ ներդրումներին` փողոցների, այգիների, պուրակների, խաղահրապարակների բարեկարգմանը, համայնքային շենքերի, մշակութային տների, մանկապարտեզների, հանդիսությունների սրահների կառուցմանն ու նորոգմանը, խմելու, կոյուղու, ոռոգման ջրագծերի կառուցմանն ու նորոգմանը և գիշերային լուսավորության անցկացմանը:
Այդ ծրագրերի իրականացման համար վարչապետի մասնակցությամբ եղել են խորհրդակցություններ և հիմք ընդունելով ծրագրերի իրականացման նախատեսվող ժամկետները՝ անհրաժեշտություն է առաջացել ապահովել հավանության արժանացած ծրագրերի իրականացումը: Ներկայացվել են 17 համայնքների կողմից գնումների պահանջները և մրցույթների արդյունքների վերաբերյալ արձանագրությունները: Դրանց իրականացման համար լրացուցիչ գումար է անհրաժեշտ եղել, այդ իսկ պատճառով կառավարությունը որոշեց պետական բյուջեից համաֆինանսավորում տրամադրել:
Մեկնաբանել