Երեկ Լոռու մարզի ընդհանուր իրավասության առաջին ատյանի դատարանում,  դատավոր Նարինե Մելքոնյանի նախագահությամբ շարունակվեց Ալավերդի քաղաքի բնակիչ Ռոբերտ Մոսինյանի սպանության մեջ մեղադրվող Կամո Շահվերդյանի դատաքննությունը: 

Մոսինյանը սպանվել է  2010թ.-ի հոկտեմբերի 16-ին Ալավերդի քաղաքի բնակիչ  Կամո Շահվերդյանին պատկանող քարի արտադրամասում  տեղի ունեցած փոխհրաձգության արդյունքում: Ամբաստանյալ Կամո Շահվերդյանին նախաքննող մարմնի կողմից մեղադրանք է առաջադրվել ՀՀ  քր. օրենսգրքի 34, 104 հոդվածների 2-րդ մասով և 258 հոդվածի 3-րդ և 4-րդ մասերով:

«Պաշտպանական կողմը ընդհանրապես մտքովը չի անցկացնում, որ երբևիցե հնարավոր է Կամո Շահվերդյանին դատարանում մեղադրող դատավճիռ արձակեն»,- ասաց  Շահվերդյանի շահերի պաշտպան Հովիկ Արսենյանը:

Վերջինս նաև հայտնեց, որ թեև դատաքննությունը սկսվել է 2011թ.-ի հոկտեմբերի 4-ից, սակայն  անցած ժամանակահատվածում  հրավիրված 8 դատական  նիստերում   քրեական գործով ընդգրկված 20-ից ավելի վկաներից դատարանում ցուցմունք են տվել ընդամենը 3-ը, որոնցից 2-ը Կամո Շահվերդյանի արտադրամասի բանվորներն են:

Դատաքննության  վերջին 2 դատական նիստերը  հետաձգվել  են ամբաստանյալ   Ռոմիկ Մոսինյանի դատարան չներկայանալու պատճառով: Ըստ պաշտպան Արսենյանի` Ռոմիկ Մոսինյանը դատարան չի ներկայացել անհարգելի պատճառով: Ամբաստանյալ Ռոմիկ Մոսինյանին մեղադրանք է առաջադրված  ՀՀ քր. օրենսգրքի 258 հոդվածի 3-րդ մասով:

«Հետքը»  մինչև դատաքննության սկսվելը, ձգձգվող դատական նիստերի և  դատական վերջին 2  նիստերին դատարան չներկայացող իր պաշտպանյալի մասին  փորձեց տեղեկություն ստանալ Ռոմիկ Մոսինյանի պաշտպան Ադելինա Հակոբյանից: «Ոչ մի բան չեմ ցանկանում խոսել, գիտեք ինչի համար, որովհետև ուզում եմ իմ պաշտպանյալի հետ  համաձայնեցնել, կներեք»,- ասաց պաշտպանը:  

Դատական նիստը  սկսվեց 1 ժամ ուշացումով` դատարանի որոշմամբ Ռոմիկ  Մոսինյանին բերման ենթարկելու պատճառով: Դատական նիստին  ներկայացել էր  միայն վկա Մխիթար Գիշյանը: Մինչ վկայի հարցաքննությունը,  դատավոր  Նարինե Մելքոնյանը  ամբաստանյալ  Ռոմիկ Մոսինյանին հարցրեց, թե  ինչու նա չի ներկայացել նախորդ դատական նիստերին: Ռոմիկ Մոսինյանը դատարանին հայտնեց, որ  հիվանդ պառկած է եղել:

«Լսում ենք կողմերի կարծիքը Ռոմիկ Մոսինյանի խափանման միջոցը փոխելու վերաբերյալ: Ներկայացրել է բժշկի թուղթ»,- ասաց դատավորը: Պաշտպանական կողերը  Ռոմիկ Մոսինյանի խափանման միջոցը փոխելու   նպատակահարմարությունը թողեցին  դատարանի հայեցողությանը:

«Ինձ թվում է բոլորս հասկացանք այս փաստաթղթի իմաստը և  ոնց  է ձեռք բերվել այս փաստաթուղթը: Ուղղակի այս անգամ դատարանը ևս մեկ անգամ ու վերջին անգամ Ձեր նկատմամբ բարեհաճ վերաբերմունք է դրսևորվում  ու Ձեր  խափանման  միջոցը անփոփոխ է թողնում: Դուք տանն էլ չեք եղել,  Ձեր տուն էլ են այցելել և  դուք տանը չեք եղել:  Ուղղակի այս բժշկական թղթի հետևից էլ չեմ ուզում ինչ-որ  վերաբերմունք դրսևորել: Հաջորդ անգամ, եթե կկրկնվի Ձեր նման վերաբերմունքը  դատարանի նկատմամբ,  Ձեր խափանման միջոցը  անմիջապես կփոխվի: Պա՞րզ է»,- ամբաստանյալին ասաց  դատավոր Մելքոնյանը:

«Բայց ես հիվանդ եմ եղել»,- արդարացավ ամբաստանյալը: 

Դատավոր Մեքոնյանը հայտնեց, որ նախորդ դատական նիստին բերման որոշում է կայացվել մի քանի վկաների համար,  ովքեր այսօր նույնպես չեն ներկայացել դատարան:  Դատարան ներկայացած միակ վկայի` Ճանապարհային ոստիկանության  հետաքննող սպա Մխիթար Գիշյանի ցուցմունքները գործի համար բացահայտողական որևէ նշանակություն չունեցան: Նա ասաց, որ ամբաստանյալներին չի ճանաչում: Վկան դեպքի վայրում լսել է մի քանի  տղամարդկանց օգնության ձայն, այդ տղամարդկանց մթության մեջ չի ճանաչել: Վիրավոր Ռոբերտ Մոսինյանի որովայնի շրջանում նկատել է արյուն, սակայն  չհիշեց, թե  վիրավորին օգնելիս նրան հարցրել է, թե ինչ է պատահել:

Մխիթար Գիշյանը խոստովանեց, որ անփորձության պատճառով միջադեպից վախեցել և խառնվել է, այդ պատճառով էլ մասնագիտական կողմնորոշում չի ցուցաբերել, սակայն մի քանի տղամարդկանց հետ օգնել է վիրավոր երիտասարդին հիվանդանոց տեղափոխելուն:

«Ես կրկին հարց եմ ուզում ուղղել Ձեզ, այդ պահին դուք ինչո՞ւ որոշակի միջոցառումներ ձեռք չառաք, երբ Ձեր ներկայությամբ  հրազենով վիրավորված մարդու բերել են հիվանդանոց»,- հարցրեց դատավորը:

«Ես հետո եմ իմացել, որ վիրավորը հրազենի կրակոցի հետևանք է»,-պատասխանեց Գիշյանը: 

«Այդ դեպքում ինչու եք ներկաներին հարցրել. «Բաժին զանգահարե՞լ եք, թե՞ ոչ»:

«Արյուն էի տեսել, դրա համար եմ հարցրել»,- դատավորին պատասխանեց վկա Գիշյանը: 

Դատական նիստին այլ վկաներ չներկայացան:  Լսելով կողմերին` դատարանը  վճռեց դատարան չներկայացած վկաների համար կրկին  բերման որոշում կայացնել: Կամո Շահվերդյանի շահերի պաշտպան  Հովիկ Արսենյանը  դատարանից   պահանջեց  հաջորդ դատական նիստերին գործով ներգրավված  բոլոր  վկաների ներկայությունը դատարանում  ապահովել` ելնելով իր պաշտպանյալի առողջական վիճակից: 

Նիստի ավարտից հետո պաշտան Հովիկ Արսենյանը  «Հետքին» ասաց, որ հատկապես  Ալավերդիում կատարված վերջին սպանությունից հետո  վկաները  հրաժարվում են ներկայանալ դատարան: «Սա վկաների չպաշտպանված  զգալու և  վախի դրսևորում է»,- ասաց պաշտպանը: 

Հաջորդ դատական նիստը տեղի կունենա փետրվարի 16-ին: