Պետական եկամուտների կոմիտեի երեք պաշտոնյաներ չեն ներկայացրել պաշտոնական պարտականությունները ստանձնելու օրվա դրությամբ առկա գույքի, եկամուտների հայտարարագիր:

Վահան Մկրտչյանը ՊԵԿ օպերատիվ հետախուզության վարչության մարզային թիվ 11 (Արարատի) բաժնի պետի տեղակալ է նշանակվել օգոստոսի 27-ին, սակայն մինչ օրս հայտարարագիր չի ներկայացրել:

Նույն վարչության մարզային թիվ 12 (Արագածոտնի) բաժնի պետի տեղակալ Լյովա Գրիգորյանը նույնպես հայտարարագիր չի ներկայացրել: Նա նույնպես պաշտոնը ստանձնել է օգոստոսի 27-ին:

Իսկ ՊԵԿ Մաքսանենգության դեմ պայքարի վարչության Շիրակի տարածաշրջանային բաժնի Բավրայի բաժանմունքի պետ Լևոն Շահնազարյանը պաշտոնը ստանձնել է սեպտեմբերի 24-ից ու դարձյալ հայտարարագիր չի ներկայացրել էթիկայի հանձնաժողով:

Ուշագրավն այն է, որ Բարձրաստիճան պաշտոնատար անձանց էթիկայի հանձնաժողովը նոյեմբերի 6-ին ներկայացրել էր պաշտոնական պարտականությունները ստանձնելու օրվա դրությամբ առկա գույքի, եկամուտների հայտարարագիր չներկայացրած թվով 7 պաշտոնյայի անուն, որից 5-ը ՊԵԿ աշխատակիցներ էին: Հրապարակումից հետո նրանցից երկուսը՝ ՊԵԿ նախագահի տեղակալ Շուշանիկ Ներսիսյանը և Բագրատաշենի գլխավոր մաքսային տեսուչ Սևակ Խաչատրյանը, ներկայացրել են հայտարարագրեր:

Երկու օրերի ընթացքում հայտարարագրեր ներկայացրել են նաև ոստիկանության և քննչական կոմիտեի երկու աշխատակիցները:

29 անձինք չեն ներկայացրել պաշտոնեական պարտականությունները դադարեցնելու հայտարարագիր: Այդ պաշտոնյաների թվում են մշակույթի նախարարի արդեն նախկին տեղակալ Արև Սամուելյանը, «Վարդաշեն» քրեակատարողական հիմնարկի նախկին պետ, ներկայումս արտակարգ իրավիճակների նախարարի տեղակալ Արկադի Բալյանը և այլք: