Միքայել Մելքումյան. «Անցումային բյուջե է՝ հնի պրոբլեմները շալակած»
«Ծառուկյան» խմբակցության պատգամավոր, ԱԺ փոխխոսնակ Միքայել Մելքումյանը 2019 թվականի պետական բյուջեի նախագիծը պայմանական է իներցիոն համարում, ինչն էլ «ունի իր օբյեկտիվ պատճառները»:
«Երևի խնդիրն այն է, որ սպասումները, որոնք պետք է ակնկալեինք քաղաքական հեղափոխությունից հետո, այնքան էլ արտացոլված չեն, և իհարկե պատճառները օբյեկտիվ են. տարբեր խնդիրներ կան՝ կապված հարկային արտոնության, շրջանառության հարկի շեմի և ընդհանրապես հարկային քաղաքականության ոլորտում, որն այս կառավարությունը գիտակցում է»,- «Հետք»-ի հետ զրույցում ասաց պատգամավորը:
Միքայել Մելքումյանի խոսքով՝ այդ հարցում «Բարգավաճ Հայաստան» կուսակցությունն ունի իր մոտեցումները, որոնք արտացոլված կլինեն արտահերթ խորհրդարանական ընտրությունների նախընտրական ծրագրում:
Անդրադառնալով բյուջետային հատկացումներին, որոնք նախատեսվում են հաջորդ տարվա բյուջեով՝ տնտեսագետ փոխխոսնակն ասաց.
«Բնականաբար սոցիալական հատվածը պահպանված է, առողջապահական ոլորտում հատկացումներն ավելացել են, չի տուժել ռազմաարդյունաբերությունն ու պաշտպանական համակարգը, մենք պետք է հասկանանք, որ սա անցումային բյուջե է՝ հնի պրոբլեմները շալակած: Կարևորն այն է, որ մոդելի փոփոխություն է լինում, համակարգային կոռուպցիայի վերացում, չգրված մենաշնորհների բացակայություն, պետք են հաջորդական քայլեր, որոնք պետք է տանեն տնտեսության հետագա ազատականացմանը»,- ասաց նա:
Ինչ վերաբերում է վարչապետի պաշտոնակատար Նիկոլ Փաշինյանի՝ խորհրդարանում արած այն հայտարարությանը, որ միկրոբիզնեսը (տարեկան 20-24 մլն դրամ շրջանառություն ունեցող) ազատված է լինելու բոլոր տեսակի հարկերից, Միքայել Մելքումյանը որակեց ճիշտ քայլ, սակայն նկատեց.
«Տարեկան 20-24 միլիոն դրամ շրջանառությունը ամսական 1,5 միլիոն դրամ շրջանառություն է, օրական՝ հիսուն հազար, հիսուն հազար դրամի եկամուտը կարող է լինել 4-5000 դրամ. շեմը պետք է բարձրացնել գոնե լինի 30-35 միլիոն դրամ, այլապես եթե երկու անգամ միջին աշխատավարձից ցածր եկամուտ է, ապա այդ բիզնեսը մի քիչ անհասկանալի է»:
Վարչապետի պաշտոնակատարը խոսել էր նաև առաջնային հարկ վճարողների՝ մասնավոր ոլորտի գրանցված աշխատողների մասին՝ ընդգծելով, որ պետք է ամեն ինչ անել, որ այդ մարդկանց թիվը կրկնապատկվի ու եռապատկվի, Միքայել Մելքումյանը համաձայնեց Փաշինյանի նկատառման հետ:
«Մեզանում աշխատանքի արտադրողականության մակարդակը շատ ցածր է, մեկ աշխատողի հաշվով ստեղծած արդյունքը տասնապատիկ անգամ ցածր է այլ համադրելի երկրներից. մենք պետք է կարողանանք հիմքեր ստեղծել, որպեսզի միավոր աշխատողի հաշվով արտադրողականությունն աճի, որպեսզի ապրանքը մրցունակ դառնա»,- ասաց Միքայել Մելքումյանը:
ԱԺ փոխխոսնակը տեղեկացրեց, որ «Ծառուկյան» դաշինքը կողմ է քվեարկելու պետական բյուջեի նախագծին:
Մեկնաբանել