Փոխվարչապետ, նախարար, մարզպետ, պատգամավոր, լրագրող. ովքեր են «Իմ քայլը» դաշինքի ռեյտինգային թեկնածուները
«Քաղաքացիական պայմանագիր» կուսակցության կայքը հրապարակել է արտահերթ խորհրդարանական ընտրություններում «Իմ քայլը» դաշինքի ռեյտինգային ընտրակարգով առաջադրված պատգամավորների թեկնածուների անունները: Դաշինքը ռեյտինգային ընտրակարգով առաջադրել է 148 թեկնածու:
Կենտրոնական ընտրական հանձնաժողովը դեռ չի ամփոփել ընտրություններում առաջադրված 11 կուսակցությունները և դաշինքները ներկայացնող թեկնածուների գրանցման տվյալները, ուստի թեկնածուների կենսագրական և այլ տվյալները ԿԸՀ կայքում դեռևս չկան: Հրապարակում ենք յուրաքանչյուր ընտրատարածքում «Իմ քայլը» դաշինքի առաջադրված այն թեկնածուների անունները, որոնք քիչ թե շատ հայտնի են հանրությանը:
Թիվ 1 ընտրատարածք (Երևանի Ավան, Նոր Նորք, Քանաքեռ-Զեյթուն վարչական շրջաններ)
Այս ընտրատարածքում առաջադրվել է 13 թեկնածու, որից 3-ն անկուսակցական են, 10-ը՝ ՔՊ անդամ:
Այս ընտրատարածքում պատգամավորի թեկնածու է ՔՊ անդամ, Սփյուռքի նախարարի պաշտոնակատար Մխիթար Հայրապետյանը: Հայրապետյանը մասնագիտությամբ թուրքագետ է, 2016-ից ղեկավարում է ՔՊ-ի Նոր նորքի տարածքային կազմակերպությունը: Նախորդ խորհրդարանական ընտրություններում չի առաջադրվել:
Զարուհի Բաթոյանը ՔՊ անդամ է, Աշխատանքի և սոցիալական հարցերի նախարարի տեղակալի պաշտոնակատար: Նախկինում՝ Երևանի ավագանու «Ելք» խմբակցության անդամ: Նախորդ խորհրդարանական ընտրություններում «Ելք» դաշինքի ցուցակով կրկին այս ընտրատարածքում էր առաջադրվել և ստացել 1639 ձայն:
Հայկ Կոնջորյանը «Լուսավոր Հայաստան» կուսակցության նախկին անդամ է, օրերս դուրս եկավ կուսակցությունից, այժմ անկուսակցական է: Մասնագիտությամբ քաղաքագետ է: Նախորդ խորհրդարանական ընտրություններում «Ելք»-ի ցուցակով առաջադրվել էր թիվ 2 ընտրատարածքում և ստացել 2097 ձայն:
Մեսրոպ Պապիկյանը ՔՊ անդամ է, վարչապետի՝ հասարակական հիմունքներով խորհրդական:
Հերիքնազ Տիգրանյանն անկուսակցական է, «Թրանսփարենսի ինթերնեյշնլ» հակակոռուպցիոն ՀԿ-ի իրավախորհրդատու:
Այս ընտրատարածքում, ըստ ԿԸՀ տվյալների, գրանցված է 200 հազար 112 քաղաքացի:
Թիվ 2 ընտրատարածք (Երևանի Արաբկիր, Աջափնյակ, Դավթաշեն վարչական շրջաններ)
Այս ընտրատարածքում առաջադրված է փոխվարչապետի պաշտոնակատար Տիգրան Ավինյանը: Ավինյանը նախորդ խորհրդարանական ընտրություններում առաջադրվել էր թիվ 4 ընտրատարածքում և ստացել 373 ձայն: Տիգրան Ավինյանը նաև Երևանի ավագանու ընտրություններում էր առաջադրվել «Ելք» դաշինքի ցուցակով և մինչ հեղափոխությունը Երևանի ավագանու անդամ էր: Ունի ֆինանսների մագիստրոսի կոչում:
Հակոբ Արշակյանը ՔՊ անդամ է, Տրանսպորտի, կապի և տեղեկատվական տեխնոլոգիաների նախարարի պաշտոնակատար: Արշակյանը հանրության շրջանում նախ և առաջ հայտնի է որպես պարտադիր կուտակային կենսաթոշակային համակարգի դեմ ընդդիմացող Դ!ԵՄ ԵՄ շարժման համակարգող խմբի անդամ, ՏՏ ոլորտի ներկայացուցիչ է:
Նիկոլայ Բաղդասարյանը ՔՊ անդամ է, փաստաբան, վարչապետի պաշտոնակատարի՝ հասարակական հիմունքներով խորհրդական: 2017-ի խորհրդարանական ընտրություններում ևս թիվ 2 ընտրատարածքում էր առաջադրվել «Ելք» դաշինքի ցուցակով և ստացել 1814 ձայն:
Լիլիթ Մակունցը Մշակույթի նախարարի պաշտոնակատարն է, ՔՊ անդամ, մասնագիտութամբ բանասեր է:
Լենա Նազարյանը ՔՊ անդամ է, ԱԺ պատգամավոր, նախորդ ընտրություններում կրկին այս ընտրատարածքում է առաջադրվել և ստացել 713 ձայն: Մասնագիտությամբ լրագրող է:
Անդրանիկ Քոչարյանն անկուսակցական է, պաշտպանության նախկին փոխնախարար, 2008 թվականի Մարտի 1-ի գործով փաստահավաք խմբի ղեկավար:
Թիվ 2 ընտրատարածքն ունի 213 հազար 628 քաղաքացի:
Գայանե Աբրահամյանն անկուսակցական է, Երևանի ավագանու «Իմ քայլը» դաշինքի անդամ, մասնագիտությամբ լրագրող է:
Այս ընտրատարածքում առաջադրված է 213 հազար 628 ընտրող:
Թիվ 3 ընտրատարածք (Երևանի Մալաթիա-Սեբաստիա և Շենգավիթ վարչական շրջաններ)
Հրաչյա Հակոբյանը «Ելք» խմբակցության պատգամավոր է, ՔՊ անդամ, նախորդ ընտրություններում ևս այս ընտրատարածքում էր առաջադրվել և ստացել 3390 ձայն: Մասնագիտությամբ դերասան է:
Էրիկ Գրիգորյանն անկուսակցական է, բնապահպանության նախարարի պաշտոնակատար, մինչ նախարարի պաշտոնում նշանակվելը, եղել է փոխնախարար:
Արայիկ Հարությունյանը կրթության և գիտության նախարարի պաշտոնակատար է, ՔՊ վարչության անդամ, կուսակցության հիմնադիր վարչության նախկին նախագահ: Մասնագիտությամբ արաբագետ է: Նախորդ ընտրություններում «Ելք»-ի ցուցակով առաջադրվել էր և ստացել 3904 ձայն, մինչ հեղափոխությունը, Երևանի ավագանու անդամ էր:
Արարատ Միրզոյանը ՔՊ վարչության անդամ է, առաջին փոխվարչապետի պաշտոնակատար: Նախորդ ընտրություններում «Ելք» դաշինքի ցուցակով առաջադրվել էր այս ընտրատարածքում և, ստանալով 3999 ձայն, ընտրվել պատգամավոր: Պատմական գիտությունների թեկնածու է:
Ռուբեն Ռուբինյանը ՔՊ անդամ է, ԱԳ նախարարի տեղակալի պաշտոնակատար: Նախորդ ընտրություններում առաջադրվել էր և ստացել 769 ձայն:
Արթուր Հովհաննիսյանը ՔՊ անդամ է, Վարչապետի աշխատակազմի հանրային կապերի և տեղեկատվության կենտրոն ՊՈԱԿ-ի պետի տեղակալ: Մասնագիտությամբ լրագրող է:
Սիսակ Գաբրիելյանը ՔՊ անդամ է, «Ազատություն» ռադիոկայանի լրագրող:
Այս ընտրատարածքն ունի 225 հազար 223 ձայն:
Թիվ 4 ընտրատարածք (Երևանի Կենտրոն, Նորք-Մարաշ, Էրեբունի, Նուբարաշեն վարչական շրջաններ)
Էդուարդ Աղաջանյանը վարչապետի աշխատակազմի ղեկավարի պաշտոնակատար է, ՔՊ անդամ: Նախորդ ընտրություններում այս ընտրատարածքում ստացել էր 940 ձայն, մինչ հեղափոխությունը Երևանի ավագանու «Ելք» խմբակցության անդամ էր: Ունի ֆինանսական ակտիվների կառավարման մագիստրոսի կոչում:
Լուսինե Բադալյանը ՔՊ անդամ է, Երևանի ավագանու «Իմ քայլը» խմբակցության անդամ, հեռուստահաղորդավար է:
Արսեն Թորոսյանը ՔՊ անդամ է, առողջապահության նախարարի պաշտոնակատար: Մասնագիտությամբ բժիշկ է, մինչ հեղափոխությունը քաղաքական գործունեությամբ չի զբաղվել:
Նարինե Թուխիկյանն անկուսակցական է, Հովհաննես Թումանյանի անվան տուն-թանգարանի տնօրեն, Երևանի ավագանու «Իմ քայլը» խմբակցության անդամ:
Դավիթ Սանասարյանը վարչապետի Վերահսկողական ծառայության ղեկավարն է, օրերս համալրել է ՔՊ կուսակցության շարքերը: Նախկինում եղել է «Ժառանգություն» կուսակցության անդամ, Երևանի ավագանու «Բարև Երևան» խմբակցության անդամ:
Հակոբ Սիմիդյանը ՔՊ հիմնադիր վարչության անդամ է, տարածքային կառավարման և զարգացման նախարարի տեղակալի պաշտոնակատար: 5-րդ գումարման խորհրդարանում եղել է ՀԱԿ խմբակցության պատգամավոր Նիկոլ Փաշինյանի օգնականը:
Ալեն Սիմոնյանը ՔՊ վարչության անդամ է, ԱԺ պատգամավոր, նախորդ ընտրություններում «Ելք» դաշինքի ցուցակով մասնակցել էր ընտրություններին և ստանալով 1870 ձայն` ընտրվել պատգամավոր:
Արմեն Փամբուխչյանը ՔՊ անդամ է, տրանսպորտի, կապի և տեղեկատվական տեխնոլոգիաների նախարարի առաջին տեղակալի պաշտոնակատար:
Այս ընտրատարածքն ունի 209 հազար 35 ընտրող:
Թիվ 5 ընտրատարածք (Արարատի մարզ)
Գարիկ Սարգսյանը ՔՊ վարչության անդամ է, Արարատի մարզպետի պաշտոնակատար: Նախորդ ընտրություններում ևս Գարիկ Սարգսյանն առաջադրվել էր այս ընտրատարածքում և ստացել 383 ձայն: Մինչ հեղափոխությունը Նոր կյանք համայնքի ղեկավարն էր:
Հովիկ Աղազարյանը ՔՊ անդամ է, ԱԺ «Ելք» խմբակցության պատգամավոր, նախորդ ընտրություններում առաջադրվել էր թիվ 1 ընտրատարածքում և ստացել 2620 ձայն:
Այս ընտրատարածքն ունի 221 հազար 665 ձայն: Դաշինքն այստեղ առաջադրել է 11 թեկնածուի:
Թիվ 6 ընտրատարածք (Արմավիրի մարզ)
Առաքել Միրզոյանն անկուսակցական է, ծանրամարտիկ:
Այս ընտրատարածքում դաշինքն առաջադրել է 14 թեկնածուի, այստեղ ընտրության իրավունք ունի 233 հազար 635 ընտրող:
Թիվ 7 ընտրատարածք (Արագածոտնի մարզ)
Այս ընտրատարածքում դաշինքն առաջադրել է յոթ թեկնածուի: Ընտրատարածքում գրանցված է 117 հազար 534 քաղաքացի:
Թիվ 8 ընտրատարածք (Գեղարքունիքի մարզ)
Թագուհի Թովմասյանը ՔՊ անդամ է, «Ժողովուրդ» օրաթերթի խմբագիրն է:
Վարազդատ Կարապետյանն անկուսակցական է, վարչապետի պաշտոնակատար Նիկոլ Փաշինյանի խորհրդականն է:
Գնել Սանոսյանը ՔՊ անդամ է, Գեղարքունիքի մարզպետի պաշտոնակատար, բնապահպանության նախարարի տեղակալ:
Հայկ Սարգսյանը ՔՊ անդամ է, վարչապետի Վերահսկողական ծառայության պետի տեղակալ: Այս ընտրատարածքն ունի 188 հազար 45 ընտրող:
Թիվ 9 ընտրատարածք (Լոռու մարզ)
Անդրեյ Ղուկասյանը ՔՊ անդամ է, Լոռու մարզպետի պաշտոնակատար, նախորդ ընտրություններում ստացել է 285 ձայն:
Սուրեն Պապիկյանը ՔՊ վարչության փոխնախագահն է, տարածքային կառավարման և զարգացման նախարարի պաշտոնակատար: Նախորդ ընտրություններում այս ընտրատարածքում ստացել է 555 ձայն:
Արեն Մկրտչյանը ՔՊ անդամ է, վարչապետի օգնականն է:
Այս ընտրատարածքում դաշինքն առաջադրել է 14 թեկնածուի, գրանցված է 237 հազար 837 քաղաքացի:
Թիվ 10 ընտրատարածք Կոտայքի մարզ
Արման Բոշյանը ՔՊ անդամ է, սոցիալական ապահովման ծառայության պետ:
Սասուն Միքայելյանը «Ելք» խմբակցության պատգամավոր է, նախորդ ընտրություններում այս ընտրատարածքում ստացել էր 6652 քվե: ՔՊ վարչության նախագահն է:
Ռոմանոս Պետրոսյանը ՔՊ անդամ է, Կոտայքի մարզպետի ժամանակավոր պաշտոնակատար: Նախորդ ընտրություններում ստացել էր 924 ձայն:
Այս ընտրատարածքում դաշինքն առաջադրել է 8 թեկնածուի: Ընտրատարածքում ընտրության իրավունք ունի 239 հազար 847 ընտրող:
Թիվ 11 ընտրատարածք (Շիրակի մարզ)
Ֆելիքս Ցոլակյանն անկուսակցական է, ԱԻ նախարարի պաշտոնակատար, նախորդ ընտրություններում Ցոլակյանն առաջադրվել էր ՀՀԿ ցուցակով:
Կարեն Սարուխանյանը ՔՊ անդամ է, Շիրակի մարզպետի պաշտոնակատար:
Թիվ 12 ընտրատարածք (Սյունիքի և Վայոց ձորի մարզեր)
Նարեկ Բաբայանը ՔՊ անդամ է, առաջադրվել էր հոկտեմբերի 21-ին նշանակված Կապանի քաղաքապետի ընտրություններում, սակայն չէր հաղթել:
Տրդատ Սարգսյանը ՔՊ անդամ է, Վայոց Ձորի մարզպետի պաշտոնակատար:
Այս ընտրատարածքում ընտրելու իրավունք ունի 151 հազար 687 ընտրող:
Թիվ 13 Տավուշի մարզ
Վահե Ղալումյանը ՔՊ անդամ է, Տավուշի մարզպետի պաշտոնակատար:
Սիփան Փաշինյանը ՔՊ անդամ է, նախորդ ընտրություններում ստացել էր 1080 ձայն: Այս ընտրատարածքում դաշինքն առաջադրել է 7 թեկնածուի, ընտրատարածքում ընտրության իրավունք ունի 107 հազար 139 քաղաքացի:
Դաշինքի համամասնական ցուցակը գլխավորող Նիկոլ Փաշինյանն այս ընտրություններում ռեյտինգային ընտրակարգով չի առաջադրվել:
Ցանկն ամբողջությամբ կարող եք կարդալ այստեղ:
Մեկնաբանել