4-ամյա Էլեն Կարապետյանը ուրախ է, որ ծնողները Ամանորի տոներից առաջ իր համար հեռուստացույց են գնել: Նա ծնված օրվանից իրենց տանը հեռուստացույց չէր տեսել եւ մուլտֆիլմերի մասին պատկերացում էլ չուներ: Այժմ ունի սիրած հերոսները եւ մեծ ուշադրությամբ է հետեւում մանկական հաղորդումներին:

Արմավիրի մարզի Մայիսյան գյուղում ապրող Կարապետյանների ընտանիքի համար տուն ասվածն էլ հարաբերական է: 7 երեխաներն ու նրանց ծնողներն ապրում են 21քմ մակերեսով տնակում:

Նրանց ավագ դուստրն ամուսնացել է եւ որոշ չափով հեշտացրել ընտանիքի հոգսը, գոնե միայն այն պատճառով, որ մեկ հոգու քնելու տեղի խնդիրն արդեն լուծվել է:

Տնակը  դրսից քարե խարխուլ շենք է հիշեցնում, քանի որ երկաթյա տնակի շուրջը քարով պատ է շարված ձմռանը տաքություն ապահովելու համար:

Տնակն ունի 2 փոքր սենյակ, որտեղ էլ տեղավորվում է 9 հոգանոց ընտանիքը: Տեղադրված է ընդամենը 4 մահճակալ, որոնց վրա քնում են զույգերով: Մահճակալների ոտքերն էլ «չդիմանալով» ծանրաբեռնվածությանը կոտրվել են եւ հիմա դրանց փոխարեն քարեր են դրված: Նույնիսկ հացը հերթափոխով են ուտում, որովհետև ունեն մի փոքր սեղան եւ 9 հոգին չի տեղավորվում սեղանի շուրջը:

Ընտանիքում կա 5 դպրոցահասակ երեխա, որոնք բավարարվում են միայն ծանոթների տված հագուստներով: Մեր այցելության ժամանակ նրանք դպրոցում էին: Կարապետյաններից ոչ ոք չի աշխատում եւ գոյատեւում են միայն 55.500 դրամ նպաստով:

Այդ գումարով առաջնահերթ երկու պարկ ալյուր են գնում, որ կարողանան մեկ ամիս գոնե ցամաք հաց ունենալ, մնացած գումարով էլ եւ կոմունալ ծախսերն են հոգում, եւ մեկ ամիս ապրում են: Երեխաների մայրը՝ Թագուհի Սարգսյանն ասաց, որ շատ է եղել, երբ երեխաները միայն ցամաք հաց են կերել եւ այլ սննդամթերքի համար գումար չեն ունեցել:

Ընտանիքի հայրը՝ Ջոզեֆ Կարապետյանն ասում է, որ շատ է աշխատանք փնտրել, սակայն չի գտել եւ ստիպված մնացել են նպաստի հույսին: Ջոզեֆի խոսքերով, թեեւ ինքն արհեստավոր չէ, սակայն շինարարության ոլորտում կարող է բանվորություն անել, բայց այդ աշխատանքն էլ չի գտնում: Սեզոնին ընտանիքով զբաղվում են հողագործությամբ:

Ընդհանուր 1 հա-ի չափ հող ունեն, սակայն կարողանում են մշակել միայն 4000 քմ-ն, այն էլ՝ ոչ լիարժեք: Վարուցանքի ժամանակ գումար չեն ունենում, մինչեւ պարտք են անում, արդեն ուշացած են սերմը հողը դնում եւ ցանկալի բերքատվություն չեն կարողանում ապահովել:

Ջոզեֆն ասում է, որ Արցախի ազատագրական պայքարի առաջին իսկ օրերից, ընդգրկվելով  Արմավիրի «Արծիվներ» ջոկատի կազմում, մեկնել է մարտի դաշտ եւ եղել է թեժ կետերում: Արժանացել է միայն ԵԿՄ վարչության նախագահ գեներալ Մանվել Գրիգորյանի եւ ԱԺ պատգամավոր, ազատամարտիկ Ռուստամ Գասպարյանի կողմից տրված պատվոգրերի:

Ըստ Ջոզեֆի` որեւէ օգնություն չի ստացել ոչ որպես ազատամարտիկ, ոչ էլ որպես բազմազավակ ընտանիքի հայր: Դեռեւս Անդրանիկ Մարգարյանի վարչապետ եղած տարվանից նամակներով դիմել է պատկան մարմիններին, որպեսզի գոնե տունը բարեկարգելու հարցով օգնեն, սակայն ոչ մի արձագանք չի ստացել:

Պատմում է, որ Արմավիրի փոխմարզպետ Արայիկ Աղաբաբյանը մի քանի տարի առաջ բարերար է բերել գյուղ, որպեսզի տեսնի բազմազավակ ընտանիքին եւ օգնի տունը կառուցել: Խոստացել են, որ օգնությունը կլինի, սակայն այդպես էլ խոստումը գործի չի վերածվել:

Ջոզեֆի ներկայացմամբ՝  Մայիսյանի համայնքապետը եւս լուրջ օգնություն չի ցուցաբերել իրենց: Տարիներ առաջ դիմում են գրել, որ օգնություն տրամադրի, գյուղապետը 15.000 դրամ ձեւակերպել է որպես օգնություն, սակայն ընտանիք ուղարկել է ոչ թե գումարը, այլ հողի հարկի կտրոնը, քանի որ հողի հարկի տեղ է պահել:

Մի անգամ էլ գյուղապետը ներկա է եղել, թե ինչպես են անձրեւաջրերը լցվում տնակ, այդ պահին 20.000 դրամ է տվել, որպեսզի պոլիէթիլենային տոպրակով ծածկեն տանիքը: Դրանից հետո այլ օգնություն չի եղել:

«Լսեցինք, որ Նոր տարվա առիթով նախագահականում հավաքել են բազմազավակ ընտանիքներին եւ տոնը նշել, բայց ես ոչ մի բան չեմ տեսել կառավարությունից ու ընդհանրապես ոչ մեկից: Չեմ զգացել, որ կառավարությունը բազմազավակ ընտանիքներին ընդհանրապես ուշադրություն է դարձնում»,-ասում է Ջոզեֆ Կարապետյանը:

Բացի այն, որ տնակը շատ փոքր էր ու ճնշող, օդն էլ հեղձուցիչ, դրան էլ ավելացրել էր աթարի հոտը: Փայտի գնելու համար գումար չեն ունեցել եւ ստիպված աթար են գնել, որով էլ ջեռուցում են սենյակները:Երբ զրուցում էինք ծնողների հետ, տարիքով մեծ երեխաներն ամաչեցին եւ անմիջապես դուրս եկան սենյակից:

Մայիսյանի համայնքապետ Եսայի Մովսիսյանը  «Հետքի» հետ զրույցում հաստատեց, որ Ջոզեֆի ընտանիքը կարիքավոր է եւ օգնության կարիք ունի: «Ջոզեֆը կարիքավոր է, բայց ոնց որ չուզենա, որ իրեն օգնենք: Ավագանու նիստով որոշում ենք կայացրել, որ բազմազավակ հայր է, օգնություն տանք, կանչել ենք, որ օգնություն տանք, չի եկել, ասել է ինձ պետք չի»,-ասում է համայնքապետը:

Ինչ վերաբերում է հատկացված օգնության փոխարեն հողի հարկի կտրոն տալուն, ապա Եսայի Մովսիսյանը չհերքեց, որ նման բան կարող է եղած լինել: «Եթե դիմում են գրում, որ օգնությունը գնա հողի հարկ, ապա այդպես էլ անում ենք»,-ավելացրեց Ե. Մովսիսյանը: Մինչդեռ Ջոզեֆը հերքեց, որ ինքը հողի հարկի համար դիմում է գրել, կամ առաջարկել են օգնություն, բայց հրաժարվել է: