Գյուղատնտեսության նախարարությունը տեղեկացնում է, որ նախարարի պաշտոնակատար Գեղամ Գևորգյանն  այսօր ընդունել է Գյուղատնտեսության զարգացման միջազգային հիմնադրամի (IFAD) Հյուսիսային Աֆրիկայի և Եվրոպայի ստորաբաժանման հայաստանյան ծրագրերի տարածաշրջանային ղեկավար Նույֆել Թելահիգի գլխավորած պատվիրակությանը:

Ողջունելով հյուրերին` Գեղամ Գևորգյանն ընդգծել է Գյուղատնտեսության զարգացման միջազգային հիմնադրամի հետ համատեղ ծրագրերի կարևորությունը և հույս հայտնել, որ ՀՀ գյուղատնտեսության նախարարության հետ երկկողմ համագործակցությունն ավելի կընդլայնվի ու կզարգանա:

Նախարարի պաշտոնակատարը հյուրերին համառոտ ներկայացրել է գյուղատնտեսության ոլորտում կառավարության կողմից որդեգրված քաղաքականությունը և գյուղատնտեսության ոլորտում նախատեսվող բարեփոխումները, միջազգային այլ կազմակերպությունների հետ համատեղ իրականացվող ծրագրերը:
Այնուհետև կողմերը համառոտ քննարկել են ընթացիկ ծրագրերը, դրանց արդյունավետության բարձրացման ուղղված հնարավոր քայլերը, ինչպես նաև նախանշել նոր ծրագրերի իրականացման հիմնական ուղղությունները:

Զրույցի ընթացքում առանձին անդրադարձ է կատարվել Գլոբալ էկոլոգիական հիմնադրամի (ԳէՀ/GEF)` «Հայաստանում արտադրողականության աճին ուղղված հողերի կայուն կառավարում» ծրագրին, որն իրականացվում է ՀՀ ԿԱ «Գյուղական տարածքների տնտեսական զարգացման ծրագրերի իրականացման գրասենյակ» ՊՀ-ի կողմից: Ծրագրի  ընդհանուր նպատակն է բարձրացնել փոքր տնտեսություն վարող ֆերմերների եկամուտը և ակտիվները` հողերի  կայուն կառավարման համակարգերում 
և տեխնոլոգիաներում կատարվող  ներդրումների միջոցով։

Նույֆել Թելահիգն իր հերթին պատրաստակամություն է հայտնել շարունակել համագործակցությունը ՀՀ գյուղատնտեսության նախարարության հետ նոր ծրագրերի մշակման և իրականացման գործում: