«Սարյանի հետքերով» գնացել էին երեխաները
Սարյանի տուն-թանգարանի Ղազարոս և Արաքսի Սարյանների անվան դահլիճում այսօր բացվեց «Սարյանի հետքերով» խորագիրը կրող ցուցահանդես-փառատոնը: Սարյանական շունչն ու գունային լուծումներն այս անգամ ներկայացված էին 12 տարեկանից բարձր երեխաների նկարներում: Ցուցադրված էին ինչպես փառատոնին մասնակից դպրոցականների, այնպես էլ «Սարյան» ստուդիայի սաների հավաքական գեղանկարները: «Սարյան» ստուդիայի հիմնադիր Ժաննա Մանուկյանի և ստուդիայի ծրագրերի համակարգող Նարեկ Հայրապետյանի գաղափարը կյանքի կոչվեց ընդամենը մեկ տարի առաջ և իրականացվեց համատեղ ջանքերով:
Բացման խոսքով հանդես եկավ Սարյանի տուն-թանգարանի տնօրեն Ռուզան Սարյանը:
Ողջունելով մասնակիցներին՝ նա նկատեց, որ թանգարանում ներկայացված նկարների գույներն ավելի ցայտուն ու վառ են: Պատճառը թանգարանում այդքան շատ մանուկների ներկայությունն է: «Սարյանը սիրում էր ասել՝ մարդը բնություն է, բնությունը՝ մարդ: Նա բնությունն ընկալում էր իբրև մեզ տրված Աստծո հրաշալի պատգամ: Սարյանն այս երկու բառի մեջ ամփոփել է թե՛ իր ստեղծագործական կրեդոն, թե՛ որպես մարդ-արարած իր աշխարհընկալումը: Ձեր գողտրիկ ցուցահանդեսով այսօր նեկայանում եք բավական պատասխանատու քննության և տոնի՝ ցույց տալով, թե ինչպես եք ընկալում ձեզ շրջապատող աշխարհը, բնությունը, հուշարձանները»,-ասաց Ռուզան Սարյանը:
Նարեկ Հայրապետյանն էլ նշեց, որ Մարտիրոս Սարյանը հայկական գեղանկարչության հիմնասյուներից մեկն է: Ցանկացած միջոցառում, որը կապված է մեծ վարպետի անվան հետ, արդեն իսկ գեղեցիկ հեքիաթ է յուրաքանչյուր մասնակցի համար, իսկ նրա անվան թանգարանում ցուցադրվելը ոչ միայն մեծ պատիվ է, այլև պարտավորեցնող։
Ցուցահանդեսի թեմատիկան ընդգրկուն էր: Երեխաների նկարներում պատկերված էր Աշտարակի Կարմրավոր եկեղեցին, որը Սարյանի 1950-ականների աշխատանքներից է, գիշերային Բյուրականը, Բջնիի բերդը, և բնությունն իր ողջ գունապնակով:
Փառատոնի կազմակերպիչներից Ժաննա Մանուկյանի խոսքով՝ ծրագիրը պիլոտային է, սակայն հետագայում այն կլինի ավելի ընդլայնված՝ տարածքների առումով, որոնք նկարել է Սարյանը, և կընդգրկի բոլոր տարիքային խմբերին:
Շուրջ մեկ տարի տևած ճանաչողական պլեներ դասերին իրենց մասնակցություն էին բերել ծրագրի հետ համագործակցող տարբեր դպրոցների սովորողները: «Տաթև» դպրոցի կերպարվեստի ուսուցչուհի Անահիտ Առաքելյանն իր գոհունակությունը հայտնեց թանգարանի ղեկավարությանը, կազմակերպիչներին հրաշալի նախաձեռնության համար, քանզի ստեղծվել է Մարտիրոս Սարյանի գեղեցիկ ներաշխարհի ու աշխատանքների հետ առնչվելու հիանալի հնարավորություն նաև այն երեխաների համար, ովքեր չեն հաճախում մասնագիտական ուսումնական հաստատություններ:
Թանգարանի կողմից փառատոնի մասնակիցներին և համագործակցող դպրոցներին հանձնվեցին շնորհակալագրեր, ապա կազմակերպվեց շրջայց թանգարանում՝ Սարյանի այն նկարների բնօրինկարների մոտ, որոնց հետքերով գնացել էին մասնակիցները:
Սարյանի տուն-թանգարանում նկարների ցուցադրությունը կտեևի մի քանի օր, և այցելուները հնարավորություն կունենան դիտելու երեխաների աշխատաքները:
Մեկնաբանել