HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Էջմիածնում քարոզչական պաստառները փակցնում են նույնիսկ արագաչափերի ու եկեղեցու տարածքների վրա

Ազգային ժողովի արտահերթ ընտրությունների քարոզարշավը մոտենում է ավարտին: Թեկնածուները ջանք ու եռանդ չեն խնայում ընտրողներին համոզելու հարցում: Էջմիածին քաղաքը հեղեղված է քարոզչական պաստառներով, որոնց զգալի մասը փակցված է չթույլատրված վայրերում: Օրինակ՝ բազմաբնակարան շենքերին, Մայր Աթոռի այգու պարիսպներին, ճանապարհներին տեղադրված արագաչափերի վրա և այլն:

Զվարթնոց թաղամասում արագաչափերից մեկի վրա փակցված են Էջմիածնի փոխքաղաքապետերից մեկի քարոզչական նյութերը, ով պատգամավորության թեկնածու է «Իմ քայլը» դաշինքից: Մյուս արագաչափը «բռնագրավել» է ԲՀԿ-ի թեկնածուն: Իսկ Մայր Աթոռի պարիսպները հիմնականում «զարդարել» են «Բարգավաճ Հայաստան», «Լուսավոր Հայաստան», «Հայ հեղափոխական դաշնակցություն» կուսակցությունների, «Իմ քայլը» դաշինքի թեկնածուները:

«Պատանդի» կարգավիճակում են հայտնվել Էջմիածնի մայթեզրի ծառերը: Թեկնածուները քարոզչական թերթիկները փակցրել են հենց ծառերի վրա՝ դրանք ամրացնելով սոսնձով կամ քիմիական այլ նյութերով:

Էջմիածնի քաղաքապետ Դիանա Գասպարյանը «Հետք»-ի հետ զրույցում ասաց, որ չթույլատրված վայրերում քարոզչական նյութեր փակցնելը համատարած բնույթ է կրում նաև այլ համայնքներում: Այս երևույթը եղել է նաև նախորդ իշխանությունների ժամանակ:

«Մեր թիմի թեկնածուներին արդեն տեղեկացրել եմ, պատրաստ եմ նաև դա հրապարակային անել, որ ամսի 8-ին՝ լռության օրը, սկսեն բոլոր պաստառները վերացնելու գործընթացը: Իսկ մնացած քաղաքական ուժերին կարող եմ անդրադառնալ միայն այն ժամանակ, երբ իմ թիմի՝ «Իմ քայլը» դաշինքի թեկնածուների քարոզչական պաստառներն ամբողջությամբ վերացված կլինեն: Համաձայն եմ, որ աչքի համար բավականին տհաճ տեսարան է: Հասկանում եմ նաև քաղաքացիների դժգոհությունը, սակայն իրավիճակը վերահսկողությունից դուրս է եկել և միայն համայնքային միջոցներով դժվար է վերահսկել»,- ասում է Դիանա Գասպարյանը:

Քաղաքապետի խոսքերով՝ քարոզչությանը քիչ ժամանակ է մնացել, հույս ունի, որ ընտրությունների հենց հաջորդ օրվանից մաքրման աշխատանքներն ավելի մասսայական բնույթ կկրեն:

Նշենք, որ ընտրական օրենսգրքի 21-րդ հոդվածի համաձայն՝ hանրության համար տեսանելի քարոզչական պաստառ, քարոզչական տպագիր և այլ նյութեր կարող են փակցվել միայն հատուկ այդ նպատակով առանձնացված տեղերում, վճարովի գովազդային վահանակներում, ընտրական շտաբների վրա:

Նույն հոդվածի համաձայն` ֆիզիկական անձանց համաձայնությամբ քարոզչական տպագիր և այլ նյութեր կարող են փակցվել նրանց պատկանող կամ նրանց տիրապետման ներքո գտնվող շենքերի, շինությունների (բացառությամբ՝ պետական և համայնքային սեփականություն հանդիսացող շենքերի, հանրակրթական դպրոցների, բազմաբնակարան կամ ստորաբաժանված շենքերի, հասարակական սննդի կամ առևտրի օբյեկտների), տրանսպորտային միջոցների (բացառությամբ՝ հասարակական տրանսպորտի և տաքսու) վրա կամ դրանց ներսում: Բազմաբնակարան կամ ստորաբաժանված շենքերի վրա քարոզչական պաստառ, քարոզչական տպագիր և այլ նյութեր կարող են տեղադրվել միայն ֆիզիկական անձի սեփականությունը հանդիսացող տարածքում (այդ թվում` պատշգամբներում, պատուհանների վրա և այլն) կամ արտաքին պատերին տեղադրված վճարովի գովազդային վահանակների վրա:

Արմավիրի փոխմարզպետներից Կարեն Գրիգորյանը ևս պատգամավորության թեկնածու է: Նա կամ իր կողմնակիցները պաստառները փակցրել են որտեղ պատահի՝ էլեկտրասյուների վրա, բենզալցակայաններում, խանութներում և այլն: Նմանատիպ պաստառներ ավելի շատ փակցված են Փարաքար համայնքում և Երևան-Արմավիր ավտոճանապարհի մերձակա տարածքներում: Թեկնածուն հենց Փարաքար համայնքից է, և իր համար տեսանելի են պաստառները, եթե նույնիսկ անձամբ չի փակցրել: