Վերաքննիչ քրեական դատարանում, դատավոր Ռուբիկ Մխիթարյանի նախագահությամբ, շարունակվում է երկրորդ նախագահ Ռոբերտ Քոչարյանի խափանման միջոցի վերաբերյալ բողոքի քննությունը:

Նշենք, որ խափանման միջոցի վերաբերյալ նիստը մեկնարկել է նոյեմբերի 27-ին: Մինչև նոյեմբերի 29-ը ներառյալ այս գործով նիստեր են եղել, սակայն դատարանը դեռևս որոշում չի կայացրել:

Նոյեմբերի 29-ին դատարանը նիստը հետաձգել էր մինչև այսօր՝ դեկտեմբերի 3-ը:
Այսօր Քոչարյանի պաշտպանական կողմը շարունակում է ներկայացնել Քոչարյանին կալանավորելու՝ առաջին ատյանի դատարանի որոշման դեմ բողոքները:
Բողոքներից մեկը կապված է ԱԱԾ տնօրենի և ՀՔԾ պետի հեռախոսային խոսակցությունների գաղտնալսման հետ: Այս բողոքը ներկայացրել է Քոչարյանի պաշտպաններից Հայկ Ալումյանը: Փաստաբանի խոսքով՝ ԱԱԾ տնօրենի և ՀՔԾ պետի հեռախոսային խոսակցություններից պարզ է դառնում, որ անձանց կալանավորել են ոչ թե նրա համար, որ առկա է գործի քննությանը խոչընդոտելու կամ քննությունից խուսափելու վտանգ, այլ որպեսզի նրանք ցուցմունքներ տան:

Մինչ այսօրվա նիստի սկսվելը` Հայկ Ալումյանը լրագրողների հետ զրույցում նշեց, որ ծանոթացել է դատավոր Ռուբիկ Մխիթարյանի կողմից ինքնաբացարկի միջնորդությունը մերժելու մասին որոշմանը:
«Դատավորը գտնում է, որ ինքնաբացարկի հիմքեր չկան, և որ օրենքով նախատեսված ընթացակարգով է ինքը քննում գործը, որ դատարանի նախագահն ինքն է որոշում, թե որ դատավորը պետք է գործը քննի: Նախ` ինքն ընդգծում է, որ դա օրենքով է նախատեսված, դրանից հետո անդրադառնալով վիճակահանությանը՝ նշում է, որ վիճակահանությունը կատարվել է, որպեսզի կամայականությունն այդ որոշումը կայացնելիս բացառվի: Դա մեզ բավարարող պատճառաբանություն չէ, որովհետև օրենքով նման բան նախատեսված չէ՝ Եվրոպական կոնվեցիայի 6-րդ հոդվածի 1-ին կետը, ի թիվս այլ իրավունքների, նախատեսում է, որ անձի վերաբերյալ գործը քննող դատարանը պետք է ստեղծվի օրենքի հիման վրա»,- ասաց Ալումյանը:

Նշենք, որ Քոչարյանի պաշտպանները դատավոր Ռուբիկ Մխիթարյանին ինքնաբացարկի միջնորդություն էին ներկայացրել այն հիմքով, որ վերջինս՝ որպես Քոչարյանի գործը քննող դատավոր է ընտրվել վիճակահանությամբ, ինչպիսի կարգ օրենքը չի նախատեսում:
Փաստաբան Ալումյանը չբացառեց, որ այսօր դատարանը որոշում կկայացնի: