Մարդու իրավունքների պաշտպանի աշխատակազմը Պաշտպանին հասցեագրվող բողոքների հիման վրա, ինչպես նաև մշտադիտարկման նպատակով վերջին մեկ շաբաթվա ընթացքում չհայտարարված այցեր է իրականացրել «Արմավիր», «Սևան», «Հրազդան» և «Վանաձոր» քրեակատարողական հիմնարկներ:

Ինչպես հայտնում է ՄԻՊ լրատվական ծառայությունը, առանձնազրույցներ են տեղի ունեցել կալանավորված անձանց և դատապարտյալների հետ: Դիմումների և բողոքների հիմնական մասը վերաբերում է համաներման ակտի կիրառման շրջանակին։

 Մի շարք ազատազրկվածներ բարձրացրել են իրենց նկատմամբ խրախուսանքի միջոցներ չկիրառելու խնդիրը, որը խոչընդոտում է պայմանական վաղաժամկետ ազատ արձակվելուն։ Ազատությունից զրկվածների մյուս մասն էլ պնդել է, որ իրենց վերաբերյալ դատական ակտերը ոչ օբյեկտիվ ու միակողմանի քննության արդյունք են։

 Պաշտպանի ներկայացուցիչներն ուսումնասիրել են հացադուլ հայտարարած անձանց բուժօգնությանն առնչվող հարցերը, ստուգվել են պահման պայմանները, իրավունքների ապահովման վիճակը և համապատասխանությունը սահմանված պահանջներին: Իրականացվել է առանձնազրույց նրանց հետ:

 Որոշ դատապարտյալներ առողջական խնդիրների վերաբերյալ հարցեր են բարձրացրել: Ուսումնասիրվել են նրանց վերաբերյալ առողջական փաստաթղթերը, ինչպես նաև բարձրացվել է լրացուցիչ բժշկական խորհրդատվություններ կազմակերպելու հարց:

Արձանագրված մի շարք խնդիրներ, ըստ ՄԻՊ աշխատակազմի, տեղում քննարկվել են քրեակատարողական հիմնարկների վարչակազմերի հետ և անմիջապես ստացել լուծումներ: Բարձրացրած մյուս խնդիրների լուծման նպատակով Մարդու իրավունքների պաշտպանի իրավասության շրջանակում գրություններ կհասցեագրվեն իրավասու պետական մարմիններին: