Երկրորդ նախագահ Ռոբերտ Քոչարյանը կկալանավորվի: Վերաքննիչ քրեական դատարանը, նախագահությամբ դատավոր Ռուբիկ Մխիթարյանի, քիչ առաջ հրապարակեց Քոչարյանի խափանման միջոցի վերաբերյալ որոշումը:

Հիշեցնենք, որ 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ Հատուկ քննչական ծառայությունում քննվող քրեական գործով 2018 թվականի հուլիսի 26-ին Հայաստանի Հանրապետության պաշտոնաթող նախագահ Ռոբերտ Քոչարյանին մեղադրանք է առաջադրվել քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: Առաջին ատյանի դատարանը նրա նկատմամբ խափանման միջոց էր ընտրել կալանավորումը, սակայն Վերաքննիչ դատարանի որոշումից հետո Քոչարյանն ազատ է արձակվել:

Վճռաբեկ դատարանը նոյեմբերի 15-ին բեկանել է Ռոբերտ Քոչարյանի նկատմամբ ընտրված խափանման միջոց կալանավորումն անձեռնմխելիության հիմքով վերացնելու վերաբերյալ Վերաքննիչ դատարանի որոշումը, և գործն ուղարկվել է նույն դատարան՝ նոր քննության: Նոյեմբերի 27-ից Վերաքննիչ դատարանը, նախագահությամբ դատավոր Ռուբիկ Մխիթարյանի, սկսել էր Քոչարյանի խափանման միջոցի հարցի քննությունն ու դեկտեմբերի 4-ին հեռացել խորհրդակցական սենյակ՝ որոշում կայացնելու: Քոչարյանն այս պահին ազատության մեջ է, սակայն նիստին չէր ներկայացել: Դատարանի որոշումը պետք է ուղարկվի ոստիկանության համապատասխան ստորաբաժանում՝ ի կատար ածելու համար: