ՀՅԴ թեկնածու Իշխան Սաղաթելյանի նկարով ավտոմեքենան կայանած է եղել ընտրատեղամասի մոտակայքում
Թիվ 8 ընտրատարածքն ընդգրկող Գեղարքունիքի մարզի Չկալովկա գյուղի 19/03 ընտրատեղամասի մոտակայքում ՀՅԴ կուսակցության պատգամավորության թեկնածու Իշխան Սաղաթելյանի նկարով ավտոմեքենա է կայանած եղել։
Մեզ հաջողվեց պարզել, որ մեքենան պատկանում է ՀՅԴ վստահված անձ Գաբրիելյան Անդրանիկին։
«Ես չգիտեի, որ դա օրենքով արգելված է»,- նշեց Անդրանիկը։
Վերջինս մեր դիտարկումից հետո անմիջապես հեռացրեց պաստառը ավտոմեքենայից։
Տեղեկացնենք նաև, որ մինչև ժամը 13:30-ը, գյուղի բնակիչը նույն անձնագրով փորձել է երկրորդ անգամ քվեարկել։
«Հիվանդ մի տղա էր, եկավ, մաման օգնեց՝ ընտրի, հետո մաման շփոթվեց, որդու անձնագրով փորձեց քվեարկել»,- պարզաբանեց հանձնաժողովի նախագահը։
Դեպքի մասին անմիջապես հաղորդվել է ոստիկանություն։ Ընտրատեղամասում աշխատող ոստիկանը դեպքերի հետ կապված մանրամասներ չներկայացրեց։
«Դիմեք լրատվական ծառայություն, ոչինչ չեմ կարող ասել»,-ասաց նա։
Ջեմմա Սարդարյան, Սոնա Աբունց
Մեկնաբանել