«Իմ քայլը» դաշինքի երրորդ վստահված անձն է փորձ արել մտնել ընտրատեղամաս
Ըստ ՀՅԴ վստահված անձ Հովիկ Փիրումյանը պատմեց, որ իրենց՝ Աջափնյակի թիվ 2 ընտրատարածքի 6/01 ընտրատեղամասում մեկ խախտում է եղել, որը չի արձանագրվել:
Թիվ 2 ընտրատարածքի 6/01 ընտրատեղամասի հանձնաժողովի քարտուղարը ցույց տվեց դատարկ գրանցամատյանը՝ փաստելու, որ խախտումներ չեն եղել:
Մինչդեռ Հովիկ Փիրումյանը պատմեց, որ ժամը 12:30-ի սահմաններում ընտրատեղամաս է մտել «Իմ քայլը» դաշինքից ներկայացող մի վստահված անձ, այն դեպքում, երբ ընտրատեղամասում արդեն կային երկու վստահված անձինք տվյալ դաշինքից:
Հովիկ Փիրումյանն ասաց, որ տվյալ անձն ուներ վստահված անձի վկայական, որից էլ հասկանալի է դարձել, որ խախտում կա:
«Մենք կարիք չգտանք խախտումը գրանցամատյանում գրանցելու, ուղղակի նրան ասացինք, որ ընտրատեղամաս մտնելուց հետո պետք է նախ գրանցվի»,- ավելացրեց ՀՅԴ վստահված անձը:
«Ես էստեղ կանգնած էի, իրենք երեք հոգով էին, ես տեսա ու մոտիկացա էդ երիտասարդին, ասացի, որ մոտենա գրանցվի, իսկ ինքը շատ հպարտ սկսեց հոխորտալ», - ասաց ընտրատեղամասի հանձնաժողովի նախագահ Ալմաստ Հարոյանը:
Նա իր խոսքում նշեց, որ տվյալ անձին խնդրել է, որ ոչ ոքի վրա ձայնը չբարձրացնի, հարձակողական տոնով չխոսի, և մյուս վստահված անձանց խնդրել է նրան կարգի հրավիրել, և նրանցից մեկը պետք է դուրս գա, որպեսզի մնան երկու հոգի:
«Ժողովուրդը և հանձնաժողովի անդամները ինձ խնդրեցին ոստիկանի հրավիրել, իհարկե ոստիկանին կանչեցի, ոստիկանն ասաց, որ ուզում է արձանագրություն կազմել, բայց ես փորձում եմ խուսափել այդպիսի բաներից», - ասաց հանձնաժողովի նախագահը:
Նրա խոսքով, վստահված անձին պարզապես դուրս են հրավիրել ընտրատեղամասից:
Ընտրատեղամասում կան 2 դիտորդներ, ովքեր ասացին, որ ընտրության սկսվելու պահից խախտում չեն նկատել:
Սոնա Գրիգորյան
Մեկնաբանել