Հանձնաժողովի նախագահ Աննա Թամրազյանի խոսքով՝ Կապանում սովորաբար ընտրողների ակտիվություն նկատվում է ժամը 15։00-ից հետո։ Հատկապես ակտիվ են տարեց ընտրողները, որոնց մեծ մասը չի տիրապետում ընտրական կարգին, դժվարություն է ունենում քվեաթերթիկ ընտրելիս։

Հանձնաժողովի նախագահը հավելեց, որ նախորդ տարիների համեմատ ընտրությունն ավելի հանգիստ է ընթանում։ Այս պահի դրությամբ Կապանի 35/4 տեղամասում 1650 ընտրողից քվեարկությանը մասնակցել է 502 մարդ։

Ընտրությունները հանդարտ են ընթանում նաև Կապանի 35/2 տեղամասում։ Այստեղ 1509 ընտրողից քվեարկությանը մասնակցել է 498 մարդ։

35/05 տեղամասում ևս ընտրության ընթացքը հանգիստ էր, սակայն հանձնաժողովի ԲՀԿ-ական նախագահ Արտուշ Պետրոսյանը հրաժարվում էր «Հետք»-ին տեղեկատվություն տրամադրել այդ պահին քվեարկության մասնակցած ընտրողների թվի մասին՝ նշելով, որ տվյալներ տրամադրում է միայն ԿԸՀ-ին։ Միայն տարածքային ընտրական հանձնաժողով մեր կատարած զանգից և ՏԸՀ-ից զանգ ստանալուց հետո հանձնաժողովի նախագահ Արտուշ Պետրոսյանը տրամադրեց ինֆորմացիա տվյալ պահին ընտրողների թվի վերաբերյալ։ Քվեարկությանը մասնակցել էր 394 ընտրող։