Շիրակի մարզն ընդգրկող թիվ 11 ընտրատարածքի Պեմզաշեն գյուղի 33/33 ընտրատեղամասում կուտակումներ են, հանձնաժողովի անդամներն ընտրողներին սահմանափակ քանակով են թողնում ընտրատեղամաս։

Հանձնաժողովի նախագահ Արփիկ Երիցյանը նշում է, որ այս պահին ակտիվությունը այդքան էլ մեծ չէ։

«Սեզոնով է պայմանավորված երևի, մեծ մասը արտերկրում է։ Մի մասն էլ իրենց տնային հարցերով են զբաղված օրվա այս ժամին։ Չեմ կարող հաստատ ասել, բայց երևի երեկոյան 19։00-ից հետո ընտրողների քանակը կշատանա։ Դե գյուղ է, մարդիկ իրենց հոգսերով են»,- ասաց Արփիկ Երիցյանը:

Ժամը 16։00-ի դրությամբ 1265 ընտրողներից մասնակցել է 528-ը։ 

Ընտրատեղամասի միակ դիտորդը դժվարանում է հիշել, թե որ կազմակերպության կողմից է հավատարմագրվել, նույնիսկ հաստատող վկայականն է վատ վիճակում։ 

Սակայն Կամսար Սարոյանը գոհ է իր աշխատանքից և, իր խոսքերով, դիտորդական առաքելությունը կատարում է լավ։ Ասում է, որ բազմամյա փորձ ունի այս ոլորտում, ցանկացել է «Իմ Քայլը» դաշինքի վստահված անձը լինել, չի ստացվել։ Գրանցամատյանից ճշտեցինք, որ Կամսար Սարոյանը «Միացյալ առաջնորդների պալատ» ՀԿ-ից է: 

Նախորդ 7 ժամերի ընթացքում գրանցամատյանում ընտրախախտումներ կամ պատահարներ արձանագրված չեն։ Սակայն հանձնաժողովի անդամները փոքր ժամանակով սուրճի ընդմիջման գնացին, քվեատուփի մոտ նստած հանձնաժողովի անդամին փոխարինեց հանձնաժողովի նախագահը։

Այս տեղամասում գրանցվել է օգնության երկու դեպք։

Պեմզաշենցիները մեզ հետ զրույցում ասացին, որ չեն վստահում ոչ մի ուժի և թե ինչի համար են եկել՝ իրենք էլ չգիտեն։ Գյուղացիներից մեկն ասաց, որ հիմնականում գյուղում ջրի հարցն է ակտուակ, սակայն հույս չունեն, որ ընտրություններից հետո ինչ-որ բան կփոխվի Պեմզաշենում։

«Քվեարկենքգը հանուն փոփոխության, ամեն տեղ էլ փոփոխությունը լավ է»,- նշեց պեմզաշենցին: 

Հանձնաժողովի նախագահը փաստում է, որ ընտրատեղամասում չեն գրանցվել նաև ընտրակարգի հետ կապված խնդիրներ։ Ասում է՝ նախորդ ընտրությունների ժամանակ բնակիչներն արդեն ծանոթացել են ընտրակարգի այս ձևին։

Պեմզաշենի մյուս՝ 33/34 ընտրատեղամասում, նախագահ Ալեքսան Աբրահամյանի խոսքով, ընտրողների պասիվությունմ  անհասկանալի է, մանավանդ օրվա այս ժամին։ Այս տեղամասում 1019 ընտրողներից մինչ այս պահը մասնակցել է 433-ը, մասնակցածների մեծ մասը տարեցներ են, ովքեր դժվարանում են ընտրել վատ լուսավորության և իրենց համար բարդ ընտրակարգի պատճառով։

Այս ընտրատեղամասի գրանցամատյանում նույնպես խախտումների կամ այլ դեպքերի արձանագրություններ չկան։ Սակայն «Իմ քայլը» դաշինքի վստահված անձանց թիվը 4-ն է։ 

Չնայած ընտրատեղամասի դահլիճում ընտրողների թիվը մեծ չէ, բայց ընտրատեղամասի դիմաց կան կուտակումներ

Էդգար Ղուշչյան
Ալբերտ Սերոբյան