Աջափնյակ վարչական շրջանն ընդգրկող թիվ 2 ընտրատարածքի 6/39 ընտրատեղամասում հանձնաժողովի քարտուղար Անահիտ Ադամյանի սեղանին, բացի գրանցամատյանից, կային սուրճի բաժակներ և ուտելիք:

«Մի նկարի էլի»,- ասաց հանձնաժողովի քարտուղարը և սկսեց սեղանից արագ հավաքել ուտելիքը:

Հանձնաժողովի նախագահ Սուսաննա Նիկողոսյանն ասաց, որ նա ուշադիր է, որ հանձնաժողովի անդամների սեղանները մաքուր լինեն: 

Նշեմ, որ նա հանձնաժողովի նախագահ է նշանակվել «Ծառուկյան» դաշինքի կողմից, իսկ Անահիտ Ադամյանը հանձնաժողովի քարտուղար է նշանակվել ՀՀԿ-ի կողմից:

«Դե հիմա մի երկու կտոր միրգ կարող ա լիներ, էս կինը տեղից չի հասցնում վեր կենա»,-ասաց Սուսաննա Նիկողոսյանը:

Հանձնաժողովի նախագահի խոսքով, ընտրատեղամասում խախտումներ տեղի չեն ունեցել:

«Միայն մեկ անգամ անձը եղել է ընտրացուցակում, բայց տեխնիկական սարքը ցույց չի տվել, հետո պարզաբանեցինք, որ անձը կարող է այստեղ քվեարկել»,-նշեց նա:

Հանձնաժողովի նախագահի խոսքով տվյալ անձին տրամադրել են համարակալված կտրոն, որով կարողացել է մասնակցել քվեարկությանը:

Սոնա Գրիգորյան