Ալավերդու Սանահին գյուղական թաղամասի թիվ 24/41 ընտրատեղամասի քվեախցիկում  ընտրողները դանդաղ էի կատարում իրենց ընտրությունը: Շատերը տեղամասում հանձնաժողովի անդամներից էին տեղեկանում քվեարկության կարգին: «Այս մարդիկ մի՞թե հեռուստացույց չեն նայել, որ սովորեն քվեարկության  կարգը»,- դժգոհեց «Բարգավաճ Հայաստան» կուսակցության վստահված անձ Սուսաննա Ազիզյանը: Վստահված անձին անհանգստացում էին տեղամասի քվեախցիկի մոտ ընտրողների կուտակումները:

Ալավերդու 24/38 ընտրատեղամասի փոքր տարածքը չի բավարարում ընտրողների մեծ  հոսքին: Հանձնաժողովի նախագահ Գոհար Ավետյանը բացատրում է, որ ուղղակի ընտրողները շատ ակտիվ են գալիս ընտրության, կուտակումներն այդ պատճառով են առաջանում. «Մարդիկ որ շատ են, թվում է, թե  սենյակը փոքր է»,-ասաց նա:

Ալավերդու 24/39 տեղամասում նույնպես ընտրողների կուտակումներ կային: «Ընտրությունը նորմալ է ընթանում, մարդիկ  ակտիվ գալիս են ընտրության: Տեղամասի ընտրացուցակում գրանցված են 1555 ընտրողներ, ժամը 14:00-ի դրությամբ 345 ընտրողներ  մասնակցել են ընտրությանը»,- հայտնեց հանձնաժողովի նախագահ Սեդա Շախկյանը: Հանձնաժողովի քարտուղար Քրիստինե Ապրեսյանի խոսքով`  ընտրողները, հատկապես տարեցները, քվեախցիկում երկար են մնում, դժվարությամբ են կատարում իրենց ընտրությունը, այդ պատճառով էլ տեղամասի քվեախցիկների մոտ առաջանում են կուտակումներ:

Թրանսփարենսի  Ինթերնեշնլ հակակոռուպցիոն կենտրոնի, ժուռնալիստների «Ասպարեզ» ակումբի և «Ռեսթարթ» նախաձեռնության կողմից ստեղծված «Ականատես» դիտորդական առաքելության դիտորդների շրջիկ խմբի ղեկավար Օլեգ Դուլգարյանը Ալավերդու ընտրատեղամասերում ընտրությունների ընթացքի մասին ասաց. «Մենք այսօր հետևել ենք ընտրատեղամասերի և  թեկնածուների նախընտրական շտաբներին հարող տարածքներում ընտրողների և ավտոմեքենաների հնարավոր կուտակումներին: Շտաբների մոտ օրվա ընթացքում ընտրողների և ավտոմեքենաների կուտակումներ չենք արձանագրել»:

Օլեգ Դուլգարյան

Դիտորդի խոսքով` օրվա ընթացքում շրջագայել են նաև ընտրատեղամասերում, արձանագրել են ընտրությունների հանգիստ և նորմալ  ընթացք: Այսուհանդերձ, շրջիկ դիտորդական խումբը Ալավերդի համայնքի Աքորի գյուղում արձանագրել է 50 մետր շառավղով մարդկանց և ավտոմեքենաների մեծ կուտակումներ: «Աքորիի տեղամասի մոտ նկատել ենք նաև «Իմ քայլը» դաշինքի քարոզչական ավտոմեքենա: Դիմել ենք տեղամասի հանձնաժողովի նախագահին և վարորդին, որից հետո ավտոմեքենայից հեռացվել է քարոզչական պաստառը: Ահազանգ ունենք նաև Մեծ Այրումից: Մեր դիտորդը հայտնել է, որ «Բարգավաճ Հայաստան» կուսակցության պատգամավորի վարկանիշային թեկնածու  Գևորգ Մելքոնյանը մտել է Մեծ Այրումի ընտրական տեղամաս: Տեղամասային հանձնաժողովի նախագահ, Մեծ Այրումի վարչական ներկայացուցիչ Գայանե Ալլահվերդյանը հրաժարվել է արձանագրել թեկնածուի անթույլատրելի մուտքը տեղամասային հանձնաժողով»,-ասաց Օլեգը: Րոպեներ առաջ Օ. Դուլգարյանը հայտնեց, որ դիտորդը հասել է հաջողության և հանձնաժողովի նախագահը արձանագրել է փաստը: