Փետրվարի 1-ին Գաֆէսճեան արվեստի կենտրոնում կբացվի «Նորաձևության ճանապարհ`երկխոսություն սահմանների խաչմերուկում» ծրագրի ցուցահանդեսը, որը ներառում է հայ և եվրոպացի նկարիչ-մոդելավորողների համագործակցության արդյունքում ծնված աշխատանքները:

Բացման խոսքով հանդես կգան ՀՀ-ում Մեծ Բրիտանիայի դեսպան Քեթրին Լիչը, Բրիտանական խորհրդի հայաստանյան գրասենյակի տնօրեն Արևիկ Սարիբեկյանը և Գաֆէսճեան արվեստի կենտրոնի հանրային կապերի և մարքետինգի տնօրեն Աննա Սիմոնյանը:

Բրիտանական խորհրդի «Նորաձևության ճանապարհ» ծրագրի երկամյա ուղին անցած նկարիչ-մոդելավորողների 20 աշխատանքից բաղկացած նորարար հավաքածուն առաջինը կցուցադրվի Հայաստանում, այնուհետև` մասնակից եվրոպական երկրներում:

«Նորաձևության ճանապարհ» ծրագիրը համախբել է հինգ հայ և հինգ եվրոպացի նկարիչ-մոդելավորողների (Միացյալ Թագավորություն, Չեխիա, Դանիա, Գերմանիա, Ռումինիա): Եվրոպացի դիզայներները, այցելելով Հայաստան, տասնօրյա շրջագայության ընթացքում ծանոթացել են Հայաստանի մշակույթին, պատմությանը և ավանդույթներին, որից հետո արդեն հայ մասնակիցներն այցելել են գործընկերների երկրներ և ոգեշնչված միմյանց երկրների մշակույթով` համատեղ պատրաստել են հավաքածուն:

Հիմնական թեմա է ընտրվել ազգային ինքնությունը, սակայն հավաքածուների ստեղծմանը զուգահեռ մասնակիցներն անդրադարձել են նաև իրենց այցելած երկրների մշակութային ժառանգությանը և ավանդություններին: Իրենց հավաքածուն ստեղծելիս նկարիչ-մոդելավորողները վերցրել են տարրեր եկեղեցական հագուստներից և զարդարանքներից, փոխադրել են կրոնական ճարտարապետության հրաշագեղ ձևերը և վերագունավորել են իրենց երկինքը:

«Ցուցադրությունը բաց կլինի փետրվարի 2-ից մինչև 19-ը: Այնուհետև հավաքածուն կներկայացվի  Հայաստանի երեք մարզերում` Շիրակ, Լոռի և Սյունիք: Տարվա ընթացքում հավաքածուն կցուցադրվի մասնակից եվրոպական հինգ երկրում: Հուսով ենք, հավաքածուն կբացահայտի տարբեր երկրների մշակութային առանձնահատկությունները և այն ամբողջությունը, որ ծնվում է, երբ միմյանց հետ աշխատում են այդ մշակույթների կրողները»,- ասաց Բրիտանական խորհրդի հայաստանյան գրասենյակի տնօրեն Արևիկ Սարիբեկյանը:

«Ցուցադրությունը ներկայացվում է Գաֆէսճեան արվեստի կենտրոնում, և դա մեզ համար շատ խորհրդանշական է: Գաֆէսճեան արվեստի կենտրոնը մեկ անգամ ևս դարձավ մշակութային կամուրջ, խաչմերուկ, որտեղ կարելի է առնչվել համաշխարհային արվեստի բազմազանությանը»,- նշեց Գաֆէսճեան արվեստի կենտրոնի ղեկավար Վահագն Մարաբյանը:

Ցուցադրությունից բացի «Ցուցահանդեսի ձևավորում» թեմայով վարպետության դասընթաց է անցկացվել հայ ուսանողների և կուրատորների համար, որը վարել է «Նորաձևության ճանապարհ»  ցուցահանդեսի կուրատոր  Թոնի Չարալամբուսը: Ծրագրի շրջանակում փետրվարի 2-ին վարպետության դասընթաց կանցկացնեն նաև մասնակից նկարիչ-մոդելավորողները: Եվրոպացի դիզայներները Հայաստան են ժամանել Ավստրիական ավիաուղիների աջակցությամբ:

Ծրագիրը ֆինանսավորում են Եվրամիությունը` մշակույթի հիմնադրամի միջոցով և Եվրոպական մշակութային հիմնադրամը: Այն իրականացվում է EUNIC-ի (Եվրամիության մշակութային ազգային կենտրոնների միություն) հինգ անդամ կազմակերպությունների` Բրիտանական խորհրդի, Գյոթեի ինստիտուտի, Ռումինական մշակութային ինստիտուտի, Դանիական մշակութային ինստիտուտի և  Չեխական կենտրոնների սերտ համագործակցությամբ: «Նորաձևության ճանապարհ` երկխոսություն սահմանների խաչմերուկում»-ը EUNIC անդամ կազմակերպությունների համագործակցությամբ իրականացվող առաջին ծրագիրն է Հայաստանում: Այս մասին հայտնում է Բրիտանական խորհրդի հայաստանյան գրասենյակի հանրային կապերի բաժինը: