Երևան քաղաքի ընդհանուր իրավասության դատարանը` նախագահությամբ դատավոր Արման Հովհաննիսյանի, քիչ առաջ վերսկսեց նախկին փոխվարչապետ Արմեն Գևորգյանին կալանավորելու վերաբերյալ միջնորդության քննությունը: Գևորգյանն, ով նիստի ընդմիջումից հետո դատարանի դահլիճից փակ գոտով էր հեռացել, այժմ դատարան եկավ գլխավոր մուտքով:

Նիստն ընդմիջվել էր, քանի որ պաշտպանական կողմը լրացուցիչ նյութեր էր պահանջել, և դատարանը ժամանակ էր տրամադրել դրանց ծանոթանալու համար:

Հիշեցնենք, որ դեկտեմբերի 11-ին Արմեն Գևորգյանին երեք նոր մեղադրանք է առաջադրվել՝ առանձնապես խոշոր չափերով փողերի լվացում, առանձնապես խոշոր չափերով կաշառք ստանալ և սահմանադրական կարգը տապալելուն օժանդակել: Ավելի վաղ նրան մեղադրանք էր առաջադրվել նաև արդարադատության կայացմանը խոչընդոտելու վերաբերյալ: Գևորգյանն իրեն առաջադրված մեղադրանքը չի ընդունում:

Ավելի վաղ Հատուկ քննչական ծառայությունը հաղորդագրություն էր տարածել, որ 2008 թվականի փետրվարի 28-ից մարտի 8-ն ընկած ժամանակահատվածում ՀՀ սահմանադրական դատարանում ՀՀ նախագահի թեկնածուներ Տիգրան Կարապետյանի և Լևոն Տեր-Պետրոսյանի դիմումների հիման վրա քննության է առնվել ՀՀ կենտրոնական ընտրական հանձնաժողովի 2008 թվականի փետրվարի 24-ի՝ «Հանրապետության Նախագահ ընտրվելու մասին» թիվ 24-Ա որոշումը վիճարկելու վերաբերյալ գործը:

Ըստ ՀՔԾ-ի՝ նպատակ ունենալով խոչընդոտել տվյալ գործով սահմանադրական արդարադատության իրականացմանը՝ Արմեն Գևորգյանը, օգտագործելով իր պաշտոնեական դիրքը, 2008 թվականի մարտի սկզբներին, մինչև ՀՀ սահմանադրական դատարանի կողմից տվյալ գործով որոշում կայացնելը, ՀՀ սահմանադրական դատարանի դատավորի մոտ է ուղարկել ՀՀ նախագահի վերահսկողական ծառայությունում աշխատող վերջինիս եղբորը, ում կարգադրել է փոխանցել, որ անհրաժեշտ է կայացնել ընտրությունների արդյունքներն անփոփոխ թողնելու մասին որոշում:

Մինչ այս պահը Գևորգյանի նկատմամբ խափանման միջոց էր ընտրված չհեռանալու մասին ստորագրությունը: Ստացվում է, որ մեղադրանքը լրացնելուց հետո քննչական մարմինը գտել է, որ Գևորգյանին կալանավորելու անհրաժեշտություն կա: