Սերժ Սարգսյանի եղբորորդու՝  Նարեկ Ալեքսանդրի Սարգսյանի բնակարանից խուզարկությամբ հայտնաբերված նկարների պատկանելիությունը փորձաքննությամբ պարզվել է. դրանք պատկանում են Մարտիրոս Սարյանի վրձնին:

Այս մասին այսօր ԱԱԾ-ի կազմակերպած սեմինարի ընթացքում ասաց ԱԱԾ տնօրեն Արթուր Վանեցյանը:

Վերջինս խոսեց նաև Նարեկ Սարգսյանի՝ Ֆրանկլին Գոնսալես անվամբ ենթադրյալ կեղծ անձնագրով հայտնաբերելու ու նրան արտահանձնելու հանգամանքների մասին:

Ըստ ԱԱԾ տնօրենի՝ Նարեկ Սարգսյանը հայտնաբերվել է «Ինտերպոլի» աջակցությամբ: Հարցին՝ ԱԱԾ-ն տեղեկություն ունի՞, թե Նարեկ Սարգսյանը ինչպես է Գվատեմալայի կեղծ անձնագիր ձեռք բերել, ԱԱԾ տնօրեն Արթուր Վանեցյանն ասաց, որ դեռևս պարզ չէ:

Ըստ Վանեցյանի՝ Նարեկ Սարգսյանին առաջիկայում, սահմանված ընթացակարգերի համաձայն, կարտահանձնեն Հայաստանին: Հիշեցնենք, որ հունիսի 26-ին հարուցվել է քրեական գործ՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու կամ կրելու և թմրամիջոցների, հոգեմետ նյութերի և դրանց պրեկուրսորների ապօրինի շրջանառությունն իրացնելու կամ պատրաստելու նպատակով կամ դրանց ապօրինի իրացնելու հատկանիշներով:

Գործի շրջանակներում Նարեկ Սարգսյանի և իր թիկնապահի նկատմամբ հուլիսի 5-ին հետախուզում էր հայտարարվել այն բանից հետո, երբ իրավապահները, վերջինիս պատկանող բնակարանից տեղափոխման պահին հայտնաբերել էին երկու ճամպրուկ թմրամիջոցներ և զենքեր:

Բացի այդ, ԱԱԾ-ն հաղորդում է ստացել այն մասին, որ դեռևս 2013 թվականին Նարեկ Սարգսյանը, չարաշահելով նկարիչ Մարտիրոս Սարյանի ժառանգներից մեկի վստահությունը, նրանից վերցրել է նկարչի 14 գծանկարները, իսկ հետո, անտեսելով տուժողի բազմաթիվ պահանջները, հրաժարվել էր վերադարձնել դրանք։

ԱԱԾ աշխատակիցները հուլիսի 4-ին խուզարկություն են կատարել Նարեկ Սարգսյանի հաշվառման վայրում, որտեղից հայտնաբերվել են նկարներ, ինչպես նաև 115 000 ԱՄՆ դոլար, 27 000 եվրո, թանկարժեք ժամացույցներ, բազմաթիվ ոսկյա մետաղադրամներ և զարդեր, որոնց ձեռքբերման հանգամանքների օրինականությունը ստուգվելու է քրեական գործի վարույթի շրջանակներում: