Խոսելով Հրազդանում տիրող նախընտրական իրավիճակի մասին՝ գործող քաղաքապետ Արամ Դանիելյանը հայտարարել է, թե «մեր մրցակիցները, իրենց գործելաոճին համապատասխան, փորձում են վախի մթնոլորտ ձեւավորել»: 

«ՉԻ»- Սա, համաձայնվեք, ավելի շուտ հիշեցնում է Շուրա Բալագանովի դամբանական ճառը՝ արտասանված Պանիկովսկու գերեզմանին: Ճառը սկսվում է «միջազգային դրությունը... մեր պատասխանը Չեմբեռլենին» բառերով, եւ, ըստ էության, այդ բառերով էլ ավարտվում է: Շուրա Բալագանովը մեղք չունի. ինչ-որ տեղ լսել է այդ բառերը եւ արտասանում է: Հրազդանի գործող քաղաքապետ Արամ Դանիելյանն էլ ինչ-որ տեղ «վախի մթնոլորտ» բառակապակցությունն է լսել, եւ բնականաբար առաջին իսկ առիթով օգտագործում է: Հետաքրքիր է՝ երեբեւէ նման նախադեպ եղե՞լ է, որ գործող իշխանությունը տիրապետի հնարավոր բոլոր լծակներին եւ միաժամանակ հայտարարի, թե ընդդիմության թեկնածուն վախի մթնոլորտ է ձեւավորում: Չէ, մենք հասկանում ենք, որ անձամբ ինքը կարգին վախեցած է: Բայց դա նույնն է, թե ինչ-որ մեկը սուզվի սեփական լոգասենյակի վաննայում ու հայտարարի, թե համաշխարհային ջրհեղեղը սկսվել է: