Երևան քաղաքի ընդհանուր իրավասության դատարանում, դատավոր Մեսրոպ Մակյանի նախագահությամբ, այսօր մեկնարկեց քրեական հեղինակություն Վստրեչի Ապեր մականունով հայտնի Արամ Վարդանյանի վերաբերյալ քրեական գործով դատական նիստը:

Դատարանում գտնվող Վարդանյանը մինչև նիստի մեկնարկը լրագրողներից պահանջում էր իրեն չնկարել, իսկ մեկնարկին նրա պաշտպան Լուսինե Սահակյանը առարկեց նիստի տեսանկարահանման և լուսանկարահանման դեմ, ավելին՝ Լուսինե Սահակյանը նշեց, որ ինքը միջնորդություն ունի նիստը դռնփակ անցկացնելու վերաբերյալ:

Դատարանն այս միջնորդության լուծումը հետաձգեց, ինչ վերաբերում է նիստը տեսանկարահանելուն, ապա գործի նախապատրաստման փուլում որոշակի ժամկետով թույլատրվեց տեսանկարահանումը, սակայն վերապահումով, որ ամբաստանյալները չհայտնվեն կադրերում:

Դատական նիստն այսօր հետաձգվեց, քանի որ տուժող կողմի շահերը ներկայացնող Արայիկ Պապիկյանն, ով նոր է ներգրավվել գործում, հայտնեց, որ նյութերին ամբողջությամբ ծանոթ չէ: 

Հիշեցնենք, որ Արամ Վարդանյանն, ըստ մեղադրանքի, կազմակերպել, ղեկավարել և անձամբ մասնակցել է մի խումբ անձանց կողմից նախնական համաձայնությամբ 2017թ․ հուլիսի 17-ին Նորագավիթ թաղամասում գտնվող «Արամիս» սուպերմարկետի շրջակայքից բռնության գործադրմամբ, զենքով կյանքի և առողջության համար վտանգավոր բռնություն գործադրելու սպառնալիքով Մամիկոն Բագրատունու բացահայտ առևանգմանը։

Գործով մյուս մեղադրյալ Գարեգին Իսկանդարյանը մեղադրվում է Բագրատունուն առևանգելու մեջ:

Նշենք, որ, ըստ մեղադրանքի, առևանգման դեպքը տեղի է ունեցել 2017 թվականի հուլիսին, սակայն այս դեպքի մասին հայտնի է դարձել Հայաստանում տեղի ունեցած իշխանափոխությունից հետո:

Գործի առնչությամբ հաղորդագրություն էր տարածել Հատուկ քննչական ծառայությունը՝ նշելով, թե գործով տուժողը 2018-ի ապրիլին վերադարձել է Հայաստան, և դրանից հետո է, որ ցուցմունք է տվել քրեական հեղինակություն Վստրեչի Ապերի դեմ:

ՀՔԾ-ի հաղորդագրության համաձայն՝ Արամ Վարդանյանը կենցաղային հարցերի շուրջ պարզաբանումներ կատարելու և տուժողին պատժելու նպատակով, նախնական համաձայնություն է ձեռք բերել մի խումբ անձանց հետ` նրա առևանգումը կազմակերպելու համար: 

Հիշյալ անձինք իրենց հանցավոր նպատակն իրագործելու դիտավորությամբ, Վարդանյանի ղեկավարությամբ եւ անմիջական մասնակցությամբ 2017թ. հուլիսի 17-ին Երևան քաղաքի Նորագավիթ թաղամասում գտնվող սուպերմարկետի շրջակայքից բռնության գործադրմամբ առևանգել են տուժողին ու տեղափոխել Երևան քաղաքի բնակարաններից մեկը, որտեղ Վարդանյանը ծեծի է ենթարկել նրան, զենքով սպառնացել սպանել նրան:

Ըստ մեղադրանքի՝ տուժողին շուրջ 3 ժամ անազատության մեջ պահելուց հետո Վարդանյանը սպանության սպառնալիքի ներքո նրանից պահանջել է լքել Հայաստանի Հանրապետության տարածքը, և 2017 թվականի հուլիսի 7-ին տուժողը մեկնել է Հայաստանից, ու վերադարձել, ինչպես արդեն նշեցինք, 2018-ի ապրիլին: