Փետրվարի 1-ից մարդու իրավունքների պաշտպան Կարեն Անդրեասյանի հրամանով պաշտպանի առաջին տեղակալ է նշանակվել Աշոտ Վահանյանը։ Մեկ այլ հրամանով պաշտպանի տեղակալ է նշանակվել Գենյա Պետրոսյանը։

Աշոտ Վահանյանը 1996-2001 թվականներին  աշխատել է ՀՀ պաշտպանության նախարարությունում իրավական բաժնի պետ, այնուհետև որպես ՀՀ կենտրոնական բանկի նախագահի իրավական գծով խորհրդական: 2008 թվականից Աշոտ Վահանյանը աշխատել  է ՀՀ կառավարությունում պետաիրավական վարչության պետ: Մինչև պաշտպանի առաջին տեղակալ նշանակվելը Աշոտ Վահանյանը զբաղեցնում էր մարդու իրավունքների պաշտպանի աշխատակազմի  ղեկավարի պաշտոնը:

Գենյա Պետրոսյանը որպես մասնագետ, այնուհետև որպես իրավական հարցերով պաշտպանի օգնական սկսել է աշխատել դեռևս առաջին մարդու իրավունքների պաշտպանի աշխատակազմում։ Երկրորդ պաշտպանի պաշտոնավարման ընթացքում Գենյա Պետրոսյանը զբաղեցնում էր  պաշտպանի խոհրդականի պաշտոնը: Նախքան նշանակվելը պաշտպանի տեղակալ` Գենյա Պետրոսյանը հանդիսանում էր աշխատակազմի ղեկավարի տեղակալ: 

Պաշտպանի տեղակալների ինստիտուտի նորովի վերաբացումը պայմանավորված է պաշտպանի և իր աշխատակազմի գործունեության ակտիվությամբ և դրա հետևանքով առաջացած աշխատանքների ծավալների կտրուկ ավելացմամբ։

Պաշտպանի աշխատակազմում տեղակալների հաստիքների ֆինանսական ապահովման համար պետբյուջեից ավելացում չի արվել, իսկ այս և մի շարք կառուցվածքային այլ փոփոխությունները լրացուցիչ չեն ծանրաբեռնել հարկատուներին։ Փոփոխությունները կատարվել են բացառապես եղած միջոցների արդյունավետ բաշխման միջոցով։

Պաշտպանի աշխատակազմ