Դատավորի թեկնածուները դիմել են դատարան
Դատավորների թեկնածուների ցուցակի համապատասխան բաժինները համալրելու նպատակով անցկացված որակավորման քննությունների անցկացումից հետո, կարծես թե, օրինաչափություն է դառնում թեկնածուների կողմից բարձրագույն դատական խորհրդի որոշումները բողոքարկելը:
Դատավորների թեկնածուների ցուցակի քրեական բաժնի համալրման նպատակով 31.10.2018թ․ անցկացված որակավորման գրավոր քննության քրեական մասնագիտացման աշխատանքների 03.11.2018թ․ հրապարակված արդյունքները բողոքարկում են թեկնածուներից երկուսը՝ Արմեն Պողոսյանն ու Հայկ Իսրայելյանը:
Վերջիններս 2018թ. դեկտեմբերի 27-ին, դիմել են վարչական դատարան՝ ընդդեմ Բարձրագույն դատական խորհրդի եւ պահանջում են մասնակի՝ իրենց մասով անվավեր ճանաչել խորհրդի որոշումը և պարտավորեցնել վերջինիս դատավորների թեկնածուների քրեական մասնագիտացման բաժնի հավակնորդների ցուցակում ընդգրկել իրենց:
Նշենք, որ ըստ հրապարակված արդյունքների՝ գրավոր քննությանը մասնակցած հավակնորդներից հարցազրույցի փուլ են անցել առավելագույն հանրագումարային միավոր հավաքած 5 հավակնորդներ: Նրանց մեջ չեն եղել Արմեն Պողոսյանն ու Հայկ Իսրայելյանը: Վերջիններս համապատասխանաբար ստացել են 20.5 և 16 միավոր, որոնք անցողիկի համար բավարար չեն եղել: 5-րդ տեղը զբաղեցրած թեկնածուն՝ Անդրանիկ Սիմոնյանը, հավաքել է 60 միավոր:
Սակայն, Սիմոնյանը դեկտեմբերի 26-ին ևս դիմել է վարչական դատարան: Դատավորների թեկնածուների ցուցակի հերթական համալրման նպատակով 2018թ. դեկտեմբերի 20-ին քրեական մասնագիտացման դատավորների թեկնածուների հետ անցկացվել է հարցրազրույց, և Անդրանիկ Սիմոնյանն այդ փուլից դուրս է մնացել: Դատարանում նա վիճարկում է այդ փաստը՝ առաջ քաշելով՝ «…հարցազրույցի փուլը հայցվորի կողմից հաղթահարած համարելու, բարձրագույն դատական խորհրդի կողմից հաստատված` դատավորների թեկնածուների հավակնորդների ցուցակում հայցվորին ընդգրկելու, ուսուցումը կազմակերպելու նպատակով հայցվորի թեկնածությունը Արդարադատության ակադեմիա ներկայացնելուն պարտավորեցնելու պահանջ»:
Դեկտեմբերի 28-ին դատավորների թեկնածուների ցուցակում ընդգրկվելու վերաբերյալ վարչական ակտ ընդունելուն պարտավորեցնելու պահանջով վարչական դատարան է դիմել նաև Նելլի Աֆյանը:
Մեկնաբանել