Երեւանի ավագանին այսօր գումարված արտահերթ նիստում «Տեղական տուրքերի գծով արտոնություններ սահմանելու մասին» որոշում ընդունեց։

Ըստ այդ որոշման՝ Երևանում գործունեություն իրականացնող տնտեսվարող սուբյեկտները, որոնց 2018-ի շրջանառությունը չի գերազանցել 115 միլիոն դրամը, 2019-ին կստանան տեղական տուրքի արտոնություն։

Այս որոշումը վերաբերում է հեղուկ վառելիքի, սեղմված բնական կամ հեղուկացված նավթային գազերի վաճառքի թույլտվությանը, որոնց համար 2019-ին տեղական տուրքի դրույքաչափը կնվազի 58.33 %-ով։ Ժամը 24.00-ից հետո աշխատելու թույլտվության համար hանրային սննդի և զվարճանքի օբյեկտների տեղական տուրքի դրույքաչափը կնվազի 70 %-ով, իսկ 24.00-ից հետո աշխատող առևտրի օբյեկտներինը՝ 72.98 %-ով:

«Լուսավոր Հայաստան» խմբակցության անդամ Դավիթ Խաժակյանը նշեց, որ խմբակցությունը կողմ է քվեարկելու նախագծին, սակայն ունեն նաեւ առաջարկներ։ Նշեց, որ տնտեսվարողների կողմից բարձրացվող հարցերից է այն, որ կան քառակուսի մետրերով հաշվարկվող տեղական տուրքեր եւ մեկ միասնական սեփականության վկայականի տակ գործող առանձին տնտեսվարող սուբյեկտներ, որոնք տվյալ տարածքի միայն որոշ մասում են գործունեություն ծավալում։

«Այս դեպքում տուրքի հաշվարկը հարաբերական է դառնում։ Ժամանակին սա հայեցողության դաշտ է թողել հաշվարկողի համար, հաշվարկել ըստ սեփականության վկայականի, թե՞ ըստ տարածքի գործառնական նշանակության։ Ավագանին պետք է հստակեցում մտցնի եւ տնտեսվարողն իմանա՝ որ տարածքի համար ինչքան գումար է վճարելու»,- առարկությամբ հանդես եկավ Դավիթ Խաժակյանը։

Նախագծին կողմ քվեարկեց ավագանու 56 անդամ։