Օրեր առաջ  «Հետք»-ը նամակ էր ստացել Երևանի  բնակիչներից մեկից, որտեղ նա ահազանգում էր  Աջափնյակ վարչական շրջանի 16-րդ թաղամասի  բարձրահարկ շենքերի ոչ օրինաչափ գազաֆիկացման  աշխատանքների մասին։ Մասնավորապես նշվում էր, որ գազաֆիկացման  ընթացքում  չեն պահպանվում անվտանգության նորմերը,  շենքի բնակիչների մի մասն էլ առհասարակ դեմ է դրան։

Խնդիրը պարզաբանելու  համար  «Հետք»-ը հարցում էր ուղարկել «Գազպրոմ-Արմենիա» ընկերությանը։ Ստորև Ներկայացնում ենք  «Գազպրոմ-Արմենիա» ընկերության պարզաբանումը․ 

«Բազմաբնակարան շենքերի գազամատակարարման համակարգերի վերականգնման/վերակառուցման/ աշխատանքներն առավել արդյունավետ  իրականացնելու  և գազասպառման  համակարգերի անվտանգությունը ապահովելու նպատակով ՀՀ կառավարության 2005 թ. օգոստոսի 4-ի թիվ 1170-Ն  որոշմամբ «Բազմաբնակարան  շենքերի գազամատակարարման  համակարգերի վերականգնման /վերակառուցման/ և վերահսկողության իրականացման  ժամանակավոր կարգում» կատարված փոփոխությունների համաձայն` «Ջրատաքացուցիչ և ջեռուցման գազային սարքերը 10 և ավելի հարկայնության  շենքերում տեղադրելու դեպքում պարտադիր է ծխահեռացման  ինքնաշխատ կամ անհատական /առանձնացված/ համակարգերի առկայությունը:

Հիմք ընդունելով կատարված փոփոխությունը՝  ՀՀ տարածքում բնակարանային ֆոնդի տեխնիկական փաստացի անբավարար պայմաններ ունեցող , այդ թվում 10  և ավելի հարկայնություն ունեցող , ինչպես նաև հանրակացարանային տիպի բազմաբնակարան շենքերի գազիֆիկացման օպտիմալ տարբերակների ընտրության և նախագծման առաջադրանքների մշակման ուղղությամբ ծավալուն աշխատանքներ են տարվել, որի արդյունքում  առաջարկություն է ներկայացվել  նշված բազմաբնակարան շենքերում գազիֆիկացումը անհատական մոտեցմամբ իրականացնելու վերաբերյալ ՝ յուրաքանչյուր շենքի գազիֆիկացման  հնարավոր տարբերակը  /կամ դրա անհնարինությունը/  մասնագիտական զննումների արդյունքում կազմված եզրակացության հիման վրա:

Միաժամանակ, շենքի գազիֆիկացմանը խոչընդոտող ապօրինությունների, ինքնակամ վերակառուցումների վերացման, նախագծային նախնական տեսքի  վերականգնման ուղղությամբ համապատասխան պարտավորություններ ու պարտականություններ ամրագրելու համար  եզրակացությամբ առաջադրված  գազիֆիկացման տարբերակի մասին տեղյակ է պահվում տեղական ինքնակառավարման մարմնին / համատիրությանը,անհրաժեշտության դեպքում՝ նաև  քաղաքապետարանին/: 

Ինչ վերաբերում  է 16-րդ թաղամասի  վերոնշյալ բազմաբնակարան շենքերի գազիֆիկացման աշխատանքներին, ապա այո, Երևանի քաղաքապետարանի կողմից կատարված հարցմանն ի պատասխան դեռևս  2009թ. «ՀայՌուսգազարդ» ՓԲԸ պատասխան նամակում  նշվել է, որ ի թիվս մի շարք այլ շենքերի, այստեղ նույնպես անհնար է ձեռնարկել գազիֆիկացում՝ անբավարար տեխնիկական հնարավորությունների, բնակիչների ինքնակամ գործողությունների արդյունքում աստիճանավանդակների, միջանցքների հաճախ նաև բնակարանների օդափոխության և լուսավորության  հնարավորությունները զանգվածաբար սահմանափակելու, հրդեհաշիջման համակարգերն ու տարհանման պահեստային ուղիները արգելափակելու հետևանքով:

Այնուհետև կատարված ուսումնասիրությունների արդյունքում ներկայացվել է մասնագիտական եզրակացություն առ այն, որ նշված  շենքերում գազիֆիկացումը հնարավոր է իրագործել մուտքերը, սանդղավանդակները, ընդհանուր օգտագործման այլ տարածքները հատակագծային նախնական տեսքի բերելու, հրդեհաշիջման և ծխահեռացման համակարգերը վերականգնելու պայմանով:

2012թ.-ից  Երևանի քաղաքապետարանի Աջափնյակ վարչական շրջանի ղեկավարության կողմից աշխատանքներ են տարվել բնակիչների կողմից  որոշ  շենքերի ներսում ինքնակամ ձևափոխումների վերացման ուղղությամբ: Գործող կարգի համաձայն,  ներկայացվել են ՀՀ արտակարգ իրավիճակների նախարարության պետական  հրդեհային  և տեխնիկական անվտանգության տեսչության  համապատասխան համաձայնությունները,   կազմվել են նախագծա-նախահաշվային փաստաթղթերը, որոնց  հիման վրա էլ սահմանված կարգով կազմակերպվել և իրականացվել  են գազիֆիկացման  աշխատանքները»։

«Գազպրոմ Արմենիա» ՓԲԸ  Հասարակայնության հետ կապերի ծառայություն