Վերաքննիչ քրեական դատարանն այսօր մերժեց դատախազի ու տուժողների ներկայացուցչի բողոքները՝ թողնելով անփոփոխ Կոտայքի մարզի ընդհանուր իրավասության դատարանի դատավճիռը, որով նա դատապարտվել էր 5 տարվա ազատազրկման:

Տուժող կողմից դատական նիստին ներկա Արթուր Հակոբյանն ու Նաիրա Հայրապետյանը նշեցին, որ որոշումը բողոքարկելու են Վճռաբեկ դատարանում:

Մինչ դատավորների խորհրդակցական սենյակ անցնելը՝ Վարդան Պետրոսյանն իր դիրքորոշումը ներկայացրեց բողոքների հետ կապված՝ արձագանքելով բողոքում Ռուբեն Բալոյանի արտահայտած այն մտքին, թե Վարդան Պետրոսյանը, դուրս գրվելով հիվանդանոցից, կորել է քննիչի տեսադաշտից: Այնինչ Վարդան Պետրոսյանը ներկայացրեց քրեական գործից նյութեր, որոնց համաձայն, քննիչ Հայկարամ Հակոբյանը հստակ իմացել է, թե որտեղ է գտնվում Պետրոսյանը:

«Առավոտ շատ շուտ մեր տուն ներխուժեց ոստիկանների մի խումբ: Ինչպես լուրեր էին պտտվում, եկել են ինձ ճամպրուկները ձեռքիս բռնելու: Բայց գալիս ու տեսնում են, որ ես անկողնային հիվանդ եմ, տեղաշարժվում եմ կնոջս օգնությամբ: Առաջարկում են ինձ նոյեմբերի 7-ին ներկայանալ Եղվարդ ու հարցաքննվել որպես վկա: Ես գրավոր գրում եմ, որ առողջական ծանր վիճակի պատճառով չեմ կարող գալ: Դրանից հետո ամսի 4-ին ստորագրված ձերբակալության արձանագրություն են տալիս… հաշվի առնելով, որ Վարդան Պետրոսյանն ունի երկու անձնագիր, ուրեմն անպայման կփախչի: Մինչ այսօր պտտերացնում են, չի պտտվում, այլ պտտեցնում են լուրեր, որ ինձ բռնել են ճամպրուկները ձեռքիս օդանավակայանում, որպեսզի արդարացնեն ձերբակալելու փաստը: Ես առաջին իսկ օրվանից ասել եմ՝ պատասխանատվությունից խուսափոխ չեմ, միայն թե դուք ձեր գործողություններում եղեք արդար»,- դատարանում ասաց Վարդան Պետրոսյանը:

«Հինգ տարի կտան, թե վեց, դա ինձ համար էդքան էական չի՝ նստել եմ, նստելու եմ: Բայց ինձ համար շատ կարևոր է, որ տիկին Նաիրան գոնե հարցեր տա, ես պատասխանեմ: Ես չեմ ունեցել էդ հնարավորությունը, չեմ էլ ունենալու: Բազմիցս խնդրել եմ, ասել եմ՝ տղաներից մեկը թող գա, խոսենք: Չի ստացվել: Ես փակված եմ, բայց ես ձեզ հավատացնում եմ՝ կես ժամ զրույցից հետո դուք կտեսնեիք՝ ինչը ինչոց է: Ամենակարևոր բանը տեղի կունենար՝ հաշտեցում, կամ եթե ոչ հաշտեցում, գոնե իրար կհասկանայինք: Իսկ էսօր մենք, շատ կներեք, դարձել ենք թշնամիներ: Սա շատ ավելի կարևոր չի՞: Հազար անգամ ավելի կարևոր է սա, քան թե բողոքարկման ինչ-որ բաներ: Ինչո՞ւ ամիսներ շարունակ ձգձգել, Տաթևիկի համար էքսպերտիզաներ անել, երբ ես ասացի, որ պատրաստ եմ առաջին օրվանից մինչև հիմա հնարավորինս օգնել»,- ասաց Վարդան Պետրոսյանը՝ ավելացներով, որ հրաժարվել է ոչ թե Տաթևիկ Հակոբյանի բուժման համար վճարել, այլ փաստաբանի խելամիտ վարձատրության դիմաց: «Առաջին իսկ օրվանից ասել եմ՝ պատրաստ եմ Տաթևիկի բուժման ծախսերը հոգալ»:

Խոսելով խիստ պատժի պահանջի մասին՝ Վարդան Պետրոսյանը նշեց. «Որ կալանավորի համար ուզում եք կարդացեք բողոքի այն հատվածը, որտեղ 5 տարին պիտի դարձնել 6, որ Վարդանին ուղղեք, ծիծաղ կառաջացնի: Ուրեմն 5 տարին չի ուղղելու, 6-րդը պիտի ուղղի՞: Դուք, որ փորձված մարդիկ եք, գիտեք, որ մեր բանտերում մարդիկ չեն ուղղվում, ընդհակառակը հանցագործ են դառնում: Սա էր, որ նախորդ նիստում դահլիճի ծիծաղը առաջացրեց: Ես կալանավորների համար կարդացել եմ և՛ դատախազի, և՛ Բալոյանի ծանրացուցիչ հանգամանքները, հռհռում են»:

Դատարանը մերժեց նաև տուժող կողմի՝ դատաբժշկական հանձնաժողովային փորձաքննություն նշանակելու միջնորդությունը, որով, Ռուբեն Բալոյանի համոզմունքով, հնարավոր կլիներ պարզել, թե Տաթևիկ Հակոբյանի վերականգնողական բուժման համար որքան ժամանակ և գումար է ահնրաժեշտ:

Վարդան Պետրոսյանի փաստաբան Նիկոլայ Բաղդասարյանը դատարանին ներկայացրեց Կարմիր խաչի վերականգնողական կենտրոնի հետ կնքված պայմանագրի նախագիծ՝ նշելով, որ եթե Տաթևիկ Հակոբյանը համաձայնի գնալ բուժման, Վարդան Պետրոսյանը կպարտավորվի վճարել ծախսերը:

Նաիրա Հայրապետյանը, դատարանին դիմելով, ասաց, որ որպես մայր խնդրում է՝ այս ամենին արագ լուծում տրվի, որ Տաթևիկի բուժումը չհետաձգվի: Վարդան Պետրոսյանն էլ նշեց, որ կարող է տարօրինակ թվալ, բայց ինքն այս անգամ միանում է տուժողի իրավահաջորդ Նաիրա Հայրապետյանի խոսքին. «Այո՛, խնդրում եմ, որ այս հարցը հնարավորինս արագ լուծվի»,- ասաց Վարդան Պետրոսյանը: