Հայկ Կյուրեղյանի գործով դատական նիստի մեկնարկից րոպեներ առաջ թեև ամբաստանյալներին ուղեկցող ոստիկանական խմբի անդամները մտան դահլիճ, այդուհանդերձ Կյուրեղյանին այդպես էլ չուղեկցեցին ներս: «Հետքի» հետ զրույցում Հայկ Կյուրեղյանի հայրը` Արմենակ Կյուրեղյանն ասաց, որ իր կարծիքով որդուն «Նուբարաշեն» ՔԿՀ-ից բերել էին դատարան, քանի որ ուղեկցող ոստիկանները դահլիճում էին:
Այսօր ամենայն հավանականությամբ դատարանը պետք է լսեր Կյուրեղյանի պաշտպանական ճառը, վերջին խոսքը ու հեռանար խորհրդակցական սենյակ: Հիշեցնենք, որ դատախազ Մ․Սարգսյանը վերջին նիստի ժամանակ միջնորդել էր Հայկ Կյուրեղյանին դատապարտել 14 տարվա ազատազրկման:
Նիստը, որը նախատեսված էր այսօր ժամը 12-ին, սկսվեց մոտ կես ժամ ուշացումով, իսկ վայրկյաններ անց ընդմիջվեց 5 րոպեով: «Ցածր եք խոսում, բան չի լսվում», «Հայկին ներս բերեք, առանց Հայկի նի՞ստ եք անում էլի», «Ազատություն Հայկ Կյուրեղյանին»,- բացականչում էին ներկաները: Հենց այս բացականչություններից հետո Կենտրոն և Նորք-Մարաշ վարչական շրջանների առաջին ատյանի դատարանի դատավոր Արմեն Բեկթաշյանը հայտարարեց 5 րոպեանոց ընդմիջման մասին: Սակայն քանի որ ներկաները դուրս չէին գալիս դահլիճից, մի քանի րոպե անց կարգադրիչները հայտարարեցին, թե տեխնիկական թերություններ կան, ու քաղաքացիները պետք է իջնեն առաջին դահլիճ:
1-ին դալիճում, որը դատարանի ամենափոքր դահլիճներից մեկն է, թույլ տվեցին նստել միայն լրագրողներին ու Հայկին սատարողներից 2-3 քաղաքացու: Դահլիճում այլևս տեղ չմնաց, ու մարդիկ մնացին դռան մոտ կանգնած:
Արմեն Բեկթաշյանը փորձեց 1-ին դահլիճում վերսկսել նիստը, սակայն քաղաքացիները պահանջում էին իրենց իրավունքը` ներկա գտնվել դռնբաց դատական նիստին: Այդ պայմաններում Արմեն Բեկթաշյանը որոշում կայացրեց նիստը հետաձգել մինչև ժամը 15:00-ն:
Հիշեցնենք, որ մասնագիտությամբ ծրագրավորող, 31-ամյա Հայկ Կյուրեղյանը մեկ տարուց ավելի գտնվում է կալանքի տակ: Նա մեղադրվում է քրեական օրենսգրքի միանգամից 2 հոդվածներով` 316 և 258 (իշխանության ներկայացուցչի նկատմամբ բռնություն և խուլիգանություն): Դեպքը տեղի է ունեցել անցյալ տարի հունիսի 12-ին Շանթ Հարությունյանի և մյուս քաղաքացիների գործով դատավարությունից առաջ: Կենտրոն և Նորք-Մարաշ ընդհանուր իրավասության դատարանի դիմաց Կյուրեղյանը բարձրացել է դատարանի դիմաց կայանված մեքենաներից մեկի վրա, ապա օդամղիչ ատրճանակից մի քանի անգամ կրակել:
Ըստ քրեական գործի, տուժել է 5 ոստիկան, որոնք ստացել են թեթև մարմնական վնասվածքներ: Իր քայլը Կյուրեղյանը մեկնաբանել է որպես բողոք` ուղղված քաղաքական դատավարությունների դեմ: Գրեթե ողջ դատական պրոցեսի ընթացքում ամբաստանյալը զրկված է եղել նիստերին ներկա լինելու, նաև պաշտպանական իրավունքից` դատարանի նկատմամբ անհարգալից վերաբերմունք ցուցաբերելու պատճառաբանությամբ (Կյուրեղյանը ոտքի չէր կանգնում նիստերի ժամանակ): Նրա կարծիքով, գործ ունենք խաղալիք դատարանների հետ. «Ունենք գրպանի դատարան, ինչ-որ մեկի դատարան, ոչ թե Հայաստանի Հանրապետության դատարան»,-ասել էր Կյուրեղյանը:
Մեկնաբանություններ (1)
Մեկնաբանել