Կիրակի, 23 սեպտեմբերի

Մաքսանենգության հոդվածն ուժը կորցրել է, կապիկների գործը՝ կարճվել, իսկ մեծաքանակ ներմուծումն ու արտահանումը շարունակվում է



Գվինեայից Հայաստան մաքսանենգ ճանապարհով տեղափոխված կապիկների գործը, որը երկու տարի քննվում էր Պետական եկամուտների կոմիտեի քննչական վարչությունում, կարճվել է:

«Հետքը» ստացել է գործը կարճելու մասին ՊԵԿ-ի հատուկ կարևորագույն գործերով քննիչ Վ. Հակոբջանյանի որոշումը, որտեղ էլ ներկայացված է, թե ինչու է քրեական գործը կարճվել. այս տարվա հունիսի 15-ին ՀՀ ԱԺ կողմից ընդունվել է «ՀՀ քրեական օրենսգրքում փոփոխություններ և լրացումներ կատարելու մասին» ՀՀ օրենքը: Քրեական օրենսգրքի 215-րդ՝ մաքսանենգության հոդվածը ուժը կորցրած է ճանաչվել: Ելնելով վերագրյալից՝ Վ. Հակոբջանյանը որոշել է քրեական գործով վարույթը կարճել:

Կատարված քննչական և դատավարական գործողությունների ընթացքում պարզվել է, որ «Զու ֆաունա արտ» ընկերության սեփականատեր Արթուր Խաչատրյանը, Արաբական Միացյալ էմիրություններում գործող Domestic Animal Village ընկերությունից դեռևս 2011թ. մայիսի 13-ին գնել է տարբեր տեսակի կենդանիներ, այդ թվում՝ 2 հատ Pan Paniscus (բոնոբո) ցեղատեսակի կապիկ՝ յուրաքանչյուրը 65 դոլար: Այդ կապիկները Խաչատրյանը մայիսի 13-ին ներմուծել է Հայաստան և մաքսային ձևակերպումներ կատարելով՝ վճարել է նաև դրանից բխող մաքսային վճարները:

Քրեական գործի նախաքննության ընթացքում ՀՀ ոստիկանության Ինտերպոլի ԱԿԲ-ի միջոցով Կոնգոյի Ինտերպոլի ԱԿԲ-ից տեղեկություններ են ստացվել, որ Հայաստանում են գտնվում բոնոբո տեսակի 2 կապիկներ, որոնք ընդգրկված են CITES-ի ցանկում և վաճառքի ենթակա չեն, իսկ ՀՀ ներմուծման համար CITES թույլտվությունն ամենայն հավանականությամբ կեղծ է:

Միաժամանակ պարզվել է, որ բոնոբո կապիկներից մեկը Խաչատրյանը պահտվության պայմանագրով հանձնել է «Սերեգետի» ՍՊԸ-ի սեփականատեր Արտյոմ Վարդանյանին, սակայն 2013թ. դեկտեմբերի կեսերին «Վոդյանկա» հիվանդության պատճառով կապիկը սատկել է, իսկ նույն ցեղատեսակի մյուս կապիկը սատկել է ՀՀ ներմուծելուց մոտ 2 ամիս անց՝ «Զու ֆաունա արտ» ընկերության տարածքում խնամվելու ժամանակ:

Բոնոբոների ներմուծման CITES թույլտվության պատրաստման եղանակն ու միջոցը, ինչպես նաև դրանում առկա դրոշմակնիքը թողնելու եղանակը պարզելու նպատակով նշանակվել է դատափաստաթղթաբանական փորձաքննություն: Փորձագետի եզրակացության համաձայն՝ CITES փաստաթղթի բլանկը կատարվել է օֆսեթ տպագրական եղանակով, իսկ բլանկի սերիական համարը՝ բարձր տպագրական եղանակով: Փաստաթղթում առկա տպագիր տեքստը կատարվել է տպագրական մեքենայով: Կլոր կնիքի դրոշմները և շտամպի դրոշմն անմիջապես թողնվել են կլոր կնիքով և շտամպով: Ստորագրությունը կատարվել է անմիջապես կապտամանուշակագույն ներկանյութով լիցքավորված գնդիկավոր գրիչով: Ստորին մասում՝ սկզբում թողնվել է կլոր կնիքի դրոշմը, այնուհետև կատարվել է ստորագրությունը: Առկա ստորագրությունն ունի 3 տարուց ավելի կատարման վաղեմություն: Փաստաթղթում առկա ստորագրությունը կատարված է որոշակի «շեղող» գործոնի ազդեցությամբ, որոնց թվում կարող է լինել անսովոր դիրքերում, անսովոր վիճակում, ընդօրինակմամբ, նմանեցմամբ կատարումը:

Նշենք, որ փորձաքննությունը չի նույնականացրել, թե արդյոք համապատասխան պաշտոնյան է ստորագրել փաստաթուղթը, և այդ ստորագրությունը հենց իրավասու անձին է պատկանում, այլ ընդամենն արձանագրել է, թե ինչպես է կատարվել ստորագրությունը՝ «ընդօրինակմամբ», «նմանեցմամբ կատարումը»:

Քննիչ Հակոբջանյանը նաև արձանագրել է, որ Ինտերպոլի հայաստանյան ԱԿԲ-ի միջոցով կատարվել են անհրաժեշտ հարցումներ Կոնգոյի Դեմոկրատական Հանրապետության ինտերպոլի ԱԿԲ Արթուր Խաչատրյանի վերաբերյալ ԿԴՀ բնության պահպանության մասին 14/003 օրենքի 79-րդ հոդվածի հատկանիշներով նախատեսված հանցագործություն կատարելու համար քրեական գործի շրջանակներում Խաչատրյանի մեղքը հիմնավորող ապացույցներ և փաստաթղթեր ձեռք բերելու նպատակով, սակայն բազմաթիվ հարցումների և հիշեցումների արդյունքում ԿԴՀ Ինտերպոլի ԱԿԲ-ից, ում նախաձեռնությամբ Արթուր Խաչատրյանի նկատմամբ հայտարարվել է հետախուզում, որևէ տեղեկատվություն և փաստաթուղթ չի ստացվել:

Միաժամանակ, Ինտերպոլի հայաստանյան ԱԿԲ-ից, ստացված գրության համաձայն՝ «ոչ հավաստի աղբյուրներից ձեռք բերված տվյալների համաձայն, պահանջարկի շուկայում, բոնոբո տեսակի կապիկների արժեքը կազմում է 20,200-24000 դոլար, իսկ ծագման երկրում՝ ԿԴՀ-ում, բոնոբոների վաճառքով՝ թրաֆիքինգով զբաղվողները մեկ կապիկի համար պահանջում են 500-1000 ԱՄՆ դոլար»:

Նախաքննական մարմինը չի պարզաբանել, թե այս պայմաններում ինչպես է Արթուր Խաչատրյանը կարողացել 65 դոլարով ձեռք բերել շուկայում նման թանկ գին ունեցող կապիկը:

Համաձայն ՊԵԿ-ի տրամադրած տվյալների, բացի այս երկու բոնոբոներից, ևս հինգը ներմուծվել էր Հայաստան 2011-12թթ. և երկրից դուրս չէր եկել: Քննությունը չի անդրադարձել, թե ինչ ճակատագիր են ունեցել ներմուծված բոնոբոները և որտեղ են այժմ դրանք գտնվում:

Իսկ մինչ այս ամենը՝ Տանզանիայում մարտի 23-ից Կիլիմանջարոյի միջազգային օդանավակայանում ձերբակալված «Ջամբո» այգու սեփականատեր Արտյոմ Վարդանյանը, ով փորձել էր Արուշայից 61 կապիկ տեղափոխել, դեռևս անազատության մեջ է: Պարզվել էր, որ այդ կապիկները նույնպես Արթուր Խաչատրյանի համար պետք է տեղափոխվեին:

Ըստ ամենայնի, Արթուր Խաչատրյանը վախենում է անձամբ գնալ իր բեռի հետևից՝ Կոնգոյում հարուցված քրեական գործի շրջանակներում իր նկատմամբ հետախուզում հայտարարելու հետևանքով հնարավոր ձերբակալությունից խուսափելու համար: Բացի դրանից, ՌԴ արտահանումները ևս վերջին շրջանում իրականացնում է ՌԴ քաղաքացի իր գործընկեր Էդուարդ Խաչատուրյանը:

2015թ-ի ամռանը Արթուր Խաչատրյանը Ռուսաստան է արտահանել թութակներ, կրիաներ, վագրակատուներ, ինչպես նաև 90 հատ կապիկներ: Վերջիններիս ներմուծողը Ռուսաստանում բնակվող Էդուարդ Խաչատուրյանն է, ով զբաղվում է էկզոտիկ կենդանիների վաճառքով: Էդուարդ Խաչատուրյանն այդ կապիկները պետգնման մրցույթով վաճառել է ՌԴ Պոլիոմելիտի և վիրուսային էնցեֆալիտի Չումակովի անվան պետական հետազոտական ինստիտուտին` իմունակենսաբանական պատրաստուկների որակը վերահսկելու փորձարկումների համար:

Հարց է առաջանում, թե ինչու է Էդուարդ Խաչատուրյանը Հայաստանի միջոցով կապիկներ ներմուծում ՌԴ, եթե նա կարող է Աֆրիկայից անմիջականորեն դա անել:

Այս և բազմաթիվ այլ հարցեր ՊԵԿ-ի քննչական վարչությունը չի պարզել, այլ շտապել է կարճել քրեական գործը՝ չսպասելով նույնիսկ Կոնգոյից սպասվող փաստաթղթերին:

Լուսանկարում՝ ձախից Արտյոմ Վարդանյանը և Արթուր Խաչատրյանը: Արտյոմ Վարդանյանի լուսանկարը՝ ֆեյսբուքյան իր էջից, Արթուր Խաչատրյանի լուսանկարը՝ «Առավոտի»:


Գլխավոր էջ

Տպել    |  In English



Այս թեմայով

... կարդացեք ավելին «Կենդանիների առևտուրը և Հայաստանը» թեմայով
Մեկնաբանություններ (1)
1. նենե21:50 - 13 օգոստոսի, 2016
Ի՞նր եք ընկել էս մարդկանց հետևից;հազիվ մի կարգին բան էին ուզում անել․կենդանաբանակն մեծ այգի հիմնել ,ուրախացնել մարդկանց։Իսկ ինչու այդքան նախանձախնդիր չեք օլիգարխների ու երկիրը թալանողների հարցում։ԹԵ՞ հրահանգ չեք ստացել ,կամ էլ քաշներդ չի ներում։Բա գրե՛ք ՍՍ-ի մասին խիստ անաչառ ու քննադատական հոդվածներ։Ձանձրացանք ձեր բևեռվածությունից։
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ