«Մարիլա»-ն պարզաբանում է․ «Ընկերությունն արդեն իսկ քայլեր է ձեռնարկում՝ պարզելու հրապարակված տվյալների պատճառները»
Հոկտեմբերի 10-ին «Հետք»-ը հրապարակել էր «Կաթնաշոռ՝ աղիքային ցուպիկով և խմորասնկերի, բորբոսասնկերի անթույլատրելի քանակով» հոդվածը, որտեղ ներկայացրել էր տեղական արտադրության 7 կաթնաշոռի լաբորատոր փորձաքննության արդյունքերը։ Ըստ դրանց՝ ներկայացված նմումշներից և ոչ մեկը չէր համապատասխանում սահմանված նորմերին․ կաթնաշոռերի մեջ հայտնաբերվել է աղիքային ցուպիկ, խմորասնկերի, բորբոսասնկերի և կաթնաթթվային մանրէների անթույլատրելի քանակ:
Նմուշներից մեկը «Մարիլա» ընկերության «Սյունիքի բարիքներ» 9%-անոց կաթնաշոռն էր, որի փորձաքննության ժամանակ պարզվել է, որ կաթնաթթվային մանրէների քանակը սահմանված նորմայից 10 անգամ ցածր է, խմորասնկերի քանակը նորման գերազանցում է 5 անգամ, իսկ բորբոսասնկերինը՝ 12 անգամ։
Այսօր «Մարիլա» ընկերությունը «Հետք»-ի խմբագրություն ուղարկել է պարզաբանում, որը նույնությամբ ներկայացնում ենք ստորև․
«Հետքի» հարգելի խմբագրություն
Ձեր կայքում «Կաթնաշոռ` աղիքային ցուպիկով և խմորասնկեր , բորբոսասնկերի անթույլատրելի քանակով» վերնագրով հոդվածի հրապարակումից հետո, մեր ընկերությունը բազմաթիվ մտահոգ հեռախոսազանգեր և հաղորդագրություններ է ստանում: Հարկ ենք համարում հենց Ձեր կայքէջի միջոցով պատասխանել մեր սպառողին:
«Մարիլա» ընկերությունն իր ամենօրյա աշխատանքով ապացուցել է, որ շուկա է հանում ու սպառողին է առաջարկում բարձրորակ արտադրանք:
Մենք շնորհակալ ենք մեր հավատարիմ սպառողին, նրանց, ովքեր մեկ անգամ փորձելով մեր արտադրանքը, տարիներ շարունակ բազմատեսակ ցուցափեղկերում նախընտրում են «Մարիլան»:
«Հետք»-ը տեղական արտադրության կաթնաշոռի 6 նմուշի հետ փորձաքննության է ներկայացրել նաև «Մարիլայի» կաթնաշոռը:
Փորձաքննության արդյունքները անհանգստության մեծ ալիք են բարձրացրել, ինչն էլ չէինք կարող անպատասխան թողնել:
Նախ տեղեկացնենք, որ ընկերությունն արդեն իսկ քայլեր է ձեռնարկում պարզելու հրապարակված տվյալների պատճառները: Ու մեծ է հավանականությունը, որ դրանք իրացման ու պահման փուլերում կարող էին ի հայտ գալ:
«Մարիլա» ՍՊԸ-ն արտադրությունում միմիայն օգտագործում է ամենօրյա խիստ փորձաքննության ենթարկվող «Վամաքս» ընկերության անարատ կաթը: Մեր մասնագետների կողմից վերահսկվում է նաև օգտագործվող մերանի որակը: Ավելորդ չենք համարում մեկ անգամ ևս շեշտել, որ ընկերությունը անում է անհնարինը բացառելու համար առողջությանը վտանգավոր կաթնամթերքի մուտքը շուկա: Հետևաբար, նյութում հրապարակված տվյալները կարող են հետևանք լինել արտադրողից սպառող ճանապարհին թույլ տված թերացումների և սխալների:
Հերթական անգամ հասարակությունը կանգնել է որակյալն ընտրելու խնդրի առաջ և «Մարիլան» խիստ շահագրգիռ է պարզելու ստեղծված իրավիճակի պատճառները ու այսուհետ դրանք շրջանցելու հնարավորություններ գտնել:
Հարգանքներով՝ «Մարիլա» ՍՊԸ
Մեկնաբանել