Գևորգ Սաֆարյանի պաշտպանը հանդես եկավ պաշտպանական ճառով
Ամալյա Մարգարյան
Այսօր Կենտրոն և Նորք-Մարաշ ընդհանուր իրավասության դատարանում, Գևորգ Սաֆարյանի գործով դատական նիստի ընթացքում փաստաբան Տիգրան Հայրապետյանը հանդես եկավ պաշտպանական ճառով՝ նշելով, որ իր պաշտպանյալը քաղաքական և հասարակական գործիչ է, կայացած միջադեպի վրա էլ նրա քաղաքական գործունեությունը կարևոր դեր է կատարել։
«Սաֆարյանն ընդդիմադիր քաղաքական գործիչ է, և նրա քաղաքական գործունեությունը վերջին տարիներին ուղղված է եղել իշխանություններին պաշտոնաթող անելուն և նրանց հրաժարականը ստանալուն։ Մենք գործ ունենք ընդդիմադիր քաղաքական գործչի հետ, ում գործունեությունը ուղղված է իշխանության դեմ»,-նիստի ընթացքում հայտարարեց փաստաբանը։ Ապա ավելացրեց, որ Գևորգ Սաֆարյանը երիտասարդ լինելով, կարողացել է դառնալ ընդդիմադիր ճանաչված քաղաքական գործիչ և լինել «Հիմնադիր խորհրդարանի» անդամների ցանկում։
Փաստաբանը նշեց նաև, որ Գևորգ Սաֆարյանը բազմաթիվ անգամ ենթարկվել է բռնությունների, որի մասին իրենք նշել են նաև դատարանում։ Հիշեցրեց նրա նկատմամբ իրականացրած մահափորձը, որի պատասխանատուն այդպես էլ չի հայտնաբերվել, և հարուցված քրեական գործով որևէ մեկը պատասխանատվության չի ենթարկվել։
«Օրը ցերեկով մարդու նկատմամբ մահափորձ է կատարվել, բայց որևէ բան չի բացահայտվել։ Բազմաթիվ տեսագրություններ չեն ուսումնասիրվել»,-հայտարարեց Հայրապետյանը։
Փաստաբանը ավելացրեց նաև, որ իշխանությունները հատուկ վերաբերմոնք ունեն այն բոլոր դեպքերի նկատմամբ, որտեղ Գևորգը ինչ-որ ձևով մասնակից է։
«Ավելի քաղաքականացված մեղադրանք հնարավոր չէ պատկերացնել։ Որ նա սադրիչ ելույթներ է ունենում և նրա ելույթներից մարդիկ ավելի են ոգևորվում, ներշնչվում են, ավելի ազատատենչ են դառնում և ավելի են ցանկանում իշխանությունների հրաժարականը, բացառապես դրա համար է Գևորգ Սաֆարյանը նստած մեղադրյալի աթոռին»,-հայտարարեց փաստաբանը։
Անդրադառնալով Գեղամ Խաչատրյանին, Հայրապետյանը հիշեցրեց դեպքից մի քանի օր առաջ ոստիկանի գրած ֆեյսբուքյան գրառմանը, ով ամբաստանյալի հասցեին հայհոյանքներ էր հնչեցրել: «Հետաքրքիր է, եթե Գեղամ Խաչատրյանը այսպիսի կարծիք ունի Գևորգ Սաֆարյանի վերաբերյալ, հենց նա հագնում է համազգեստ և գնում հերթապահության, նրա վերաբերմունքը փոխվու՞մ է։ Դեպքի նախորդ օրը նույնպես Գեղամ Խաչատրյանը գրառում է կատարել, որտեղ նշել է՝ «գնում ենք մեր հայրենասիրական պարտքը կատարելու, Ամանորի գիշերը, որ բոլորն իրենց ընտանիքների հետ են, մենք ծառայելու ենք մեր հայրենիքին և Ազատության պողոտայում հավաքված կապիկներին քշելու ենք Ազատության պողոտայից»։
«Գեղամ Խաչատրյանը դատարանում հայտարարել է, որ ամեն մի հայհոյանքին ինքը պատասխանել է եռապատիկ հայհոյանքով։ Հարգելի մեղադրողը գտել է, որ Խաչատրյանը իր պաշտոնական պարտականություններն է կատարել։ Համաձայն մեղադրողի՝ ստացվում է, որ իր ծառայողական պարտականությունների կատարելու ժամանակ գումարտակի հրամանատարի պետք է հայհոյանքներ հնչեցնի։ Տեսանյութում երևում է որ ոստիկանի կողքին կան կանայք և երիտասարդ աղջիկներ։ Սա է ոստիկանի պաշտոնական պարտականությունները կատարելու հետքը»,-դատարանի դահլիճում հայտարարեց փաստաբանը։
Փաստաբանը նշեց նաև, որ այն բոլոր կառույցները, որոնք ֆինանսավորել են ոստիկանությանը, պետք է իմանան՝ իրենց գումարներն ու՞ր են գնացել։
Հաջորդ դատական նիստի ըթնացքում ելույթով հանդես կգա Գևորգ Սաֆարյանը։
Մեկնաբանել