«Ընդդեմ իրավական կամայականության» ՀԿ-ն Արայիկ Խանդոյանի գործով դիմել է գլխավոր դատախազություն
Ամալյա Մարգարյան
Փաստաբան Արա Ղարագյոզյանը «Հետքին» տեղեկացրել է, որ Արայիկ Խանդոյանի վերաբերյալ հանցագործություն կատարելու գործով «Ընդդեմ իրավական կամայականության» ՀԿ-դիմել է գլխավոր դատախազ Արթուր Դավթյանին: Փաստաբանը ուղարկել է նաև հանցագործության մասին հաղորդման օրինակը, որտեղ անդրադառնում է Վերաքննիչ քրեական դատարանում ընթացող դատական նիստին, որի ժամանակ քննվում էր Արայիկ Խանդոյանի պաշտպանների կողմից բերված վերաքննիչ բողոքը: Նիստն անց է կացվել դռնփակ կարգով, Արայիկ Խանդոյանը բորբոքվել է՝ տեսնելով դատախազին ու քննչական խմբի ղեկավարին և հայտարարել. «Ես չեմ ուզում ձեզ տեսնել, քանի որ դուք եք սպանել իմ եղբորս՝ Հաց բերողին»:
Դատական գործից հետո փաստաբանը «Հետքի» հետ զրույցում նշել էր, որ դատախազ Պետրոս Պետրոսյանը սեռական բնույթի հայհոյանքներ է հնչեցրել Արայիկ Խանդոյանի հասցեին:
«Որքան էլ սխալ ձևով իրեն դրսևորեր Ա.Խանդոյանը, դատախազը պարտավոր է զսպվածություն ցուցաբերեր, այլ ոչ թե դառնալ իրավախախտ: Նման դատախազը չպետք է տեղ ունենա դատախազության համակարգում»,- գրված է «Ընդդեմ իրավական կամայականության» ՀԿ-ի հայտարարության մեջ: Հայտարարության մեջ փաստաբանն անդրադարձել է նաև ՀՀ Քրեական օրենսգրքի 343-րդ 2-րդ մասին և նշել. «Հանցագործության սուբյեկտիվ կողմի այդպիսի արարքը բնութագրվում է ուղղակի դիտավորություն: Այսինքն դատախազը անհարգալից վերաբերմունք է դրսևորել ինչպես դատարանի, այնպես էլ դատավարության մասնակիցների նկատմամբ»:
Հանցագործության մասին հաղորդման մեջ «Ընդդեմ իրավական կամայականության» ՀԿ-ն խնդրել է «անհապաղ միջոցներ ձեռնարկել ակնհայտ հանցագործություն կատարած դատախազի նկատմամբ` հարուցել քրեական գործ և ենթարկել պատասխանատվության»:
«Հետքի» հետ զրույցում փաստաբան Արա Ղարագյոզյանը նշեց նաև, որ գլխավոր դատախազից խնդրել են նշված հաղորդումը չուղարկել Հատուկ քննչական ծառայություն՝ քննչական ծառայության` օբյեկտիվ քննություն չիրականացնելու պատճառով:
Մեկնաբանել