Շաբաթ, 21 ապրիլի

Սուրիկ Խաչատրյանի որդին «Զանգեզուր» պետական արգելավայրի հարակից տարածքում ոսկի է որոնելու



Սյունիքի նախկին մարզպետ Սուրիկ Խաչատրյանի որդուն պատկանող ընկերությունը 2018-21թթ. նախատեսում է ուսումնասիրել Սյունիքի մարզի Նշանաքարի ոսկի-բազմամետաղների տեղամասը:  

«Մետալ գրուպ» սահմանափակ պատասխանատվությամբ ընկերությունն արդեն հայտ է ներկայացրել Բնապահպանության նախարարություն: «Մետալ գրուպ» ՍՊԸ-ն ձևավորվել և իր գործունեությունն է ծավալում Սյունիքի մարզի Կապան քաղաքում: Ընկերության գործունեության ոլորտը հանքարդյունաբերությունն է: 

Համաձայն ԱՆ իրավաբանական անձանց պետական ռեգիստրի տվյալների՝ այս տարվա փետրվարի 8-ից ընկերության միանձնյա բաժնետերը Սուրիկ Խաչատրյանի 23-ամյա որդին է՝ Տրդատ Խաչատրյանը: Իսկ մինչ այդ՝ ստեղծման օրվանից ի վեր, Սուրիկ Խաչատրյանն անձամբ է կիսել ընկերության բաժնեմասն իր աներձագի՝ Վարդան Բարսեղյանի հետ: 

Նշանաքարի ոսկի-բազմամետաղային երևակումը վարչական տեսակետից գտնվում է Սյունիքի մարզում` Գեղի գետի ավազանի վերին հոսանքներում, Բարգուշատի լեռնաշղթայում, Աջիբաջ գյուղից՝ 2,4 կմ դեպի հյուսիս-արևմուտք, Քիրս գյուղից՝ 4,5 կմ դեպի հարավ-արևմուտք և Քյարուտ գյուղից՝ 4.9 կմ դեպի արևմուտք: Կապան քաղաքից հեռու է 38 կմ:

Հանքային դաշտը բնակեցված չէ, ուստի ճանապարհները բանուկ չեն, իսկ լեռնային ճանապարհները բացակայում են կամ էլ չեն համապատասխանում ժամանակակից տեխնիկայի և սարքավորումների տեղափոխման պահանջներին: Ընկերության համար խոչընդոտ է նաև այն հանգամանքը, որ տարածքը միջին և բարձր լեռնային է, լանջերն ունեն մեծ թեքություններ և դրա համար հարկ կլինի վերաբացել 5 և կառուցել 5 կմ ճանապարհ: 

Համաձայն նախագծի՝ նկարագրվող տարածքի խոշորագույն ջրային միավորը Գեղին է իր բազմաթիվ վտակներով՝ Կահուրդ, Սարիձոր և այլն: Երևակման տարածքը գտնվում է Զանգեզուրի ֆլորիստական շրջանում: Հանքերևակման տարածքը հարակից է Կովկասյան կենդանաաշխարհագրական նահանգի Զանգեզուրի անտառների շրջանին: Այստեղ հանդիպում են այծյամ, կինճ, անտառային կատու: Կրծողներից տարածված են թփուտային դաշտամուկը, պարսկական սկյուռը, քնամուկը, տիպիկ են խլուրդները: 

Բարձր լեռնային գոտում կան խոզուկ, բորենի, գայլ, նապաստակ, աղվես, կրծողներից՝ ձնաբեկ դաշտամուկ, անտառամուկ: Տարածքի ալպիական գոտիներում թռչուններից հանդիպում են ալպիական ճայուկները և աղավնիները: Բազմազան են բզեզները, մորեխները: 

Երկրաբանական ուսումնասիրության աշխատանքների համար նախատեսված տարածքը զբաղեցնում է 2170 հա և հարակից է «Զանգեզուր» պետական արգելավայրին: Սակայն նախագծողները վստահեցնում են, որ արգելավայրի տարածքում և մինչև 500 մ հեռավորության վրա չի նախատեսվում և չի կատարվելու ոչ մի տիպի աշխատանք։ 

Եվ չնայած դրան՝ նախագծողները վստահորեն հայտարարել են, որ հայցվող տարածքում Կարմիր գրքում գրանցված բուսատեսակներ կամ կենդանիների տեսակներ չեն հայտնաբերվել: 

Ընկերությունը նախագծում հայտնում է, որ երկրաբանական ուսումնասիրությունների նպատակն է «ուսումնասիրել երևակման տեղամասում հետագա արդյունահանման նպատակահարմարությունը»: Եվ քանի որ ուսումնասիրության նպատակը արդյունահանման նպատակահարմարությունն է, ապա կարելի է ենթադրել, որ եթե տարածքում պաշարներ հայտնաբերվեն, ապա արդյունահանում ևս կիրականացվի, ինչը նշանակում է, որ արգելավայրի անմիջական հարակից տարածքում կարող է նոր հանք բացվել: 

Հիշեցնենք, որ Սուրիկ Խաչատրյանի «Գեղի գօլդ» ՍՊԸ-ն նույնպես ուսումնասիրել է այդ տարածքի հիմնական մասը, ինչպես նաև «Զանգեզուր» պետական արգելավայրի հետ համընկնող որոշ հատված, որի արդյունքները հիմք ընդունելով` ուսումնասիրության նոր հայտ է ներկայացվել: 

Ապրիլի 10-ին` ժամը 15:00-ին, Սյունիքի մարզի Քաջարան համայնքի Նոր Աստղաբերդ գյուղի վարչական ղեկավարի նստավայրում տեղի կունենան «Մետալ գրուպ» ՍՊԸ-ի կողմից ներկայացված Նշանաքարի ոսկի-բազմամետաղային երևակման 2018-2021թթ երկրաբանահետախուզական աշխատանքների նախնական գնահատման հայտի վերաբերյալ հանրային քննարկումներ (2-րդ հանրային քննարկում): 

Լուսանկարում՝ Սուրիկ Խաչատրյանը (Ֆոտոլուրի) և որդին (ֆեյսբուքյան էջից):


Գլխավոր էջ



Մեկնաբանություններ (2)
1. Ընթերցող09:45 - 28 մարտի, 2018
Հանքը թթու թան չի, ամեն մարդու բան չի, հեսա տեսնում ենք թե ոնց են հերթով քաշվում: Ասում են թեղուտի Մեժլումը ոտով գլխով գրավի տակ է: Ախլքալաքցի Վրթոն էր հանքի ուստա, հիմա քիթը տանից չի հանում: Մի քյավառցի սիրուն դեպուտատ հանքագործ էլ կար (ոնց որ Արզաքյանց էր անունը), հիմա մկան նման սսկվել է: Հա մուկ ասեցինք, ոնց որ ինքն էլ էր ոսկու գործ անում էն ասածի հետ, հիմա բախչա-մախչեն ա ծախծխում: Քաշվողները շատ են, որին ասենք: Բայց դե ագահությունը անբուժելի ցավ ա: Էս մեկն էլ հաստատ կտնկգվի հանքի վրա, սա հեչ ուղեղ չունի: Միայն ափսոս որ խեղճ անասուներն են արոտից զրկում:
2. Գագիկ15:16 - 29 մարտի, 2018
Լեռնահանքային արտադրությունում և մետալուրգիայում մակերեսային մոտեցմամբ հաջողության չես հասնի։ Բացի հանքի հետախուզական աշխատանքներին-եթե այն հաջողությամբ է ավարտվում, պետք է կատարել մետաղի կորզման աշխատանքներ յուրաքանչյուր հանքավայրի համար նախորոք մշակելով ուրույն տեխնոլոգիա։ Ինչքանով են ճիշտ համագործակցում մերօրյա վայ հարուստները գիտնականների և իրական մասնագետների հետ, ցույց է տալիս իրենց այսօրվա նշված բնագավառում։ Դե եթե ավելացնենք նաև բնապահպանական նորմերի հաշվի չառնումը և գյուղատնտեսությանը հասցրած երկարաժամկետ վնասը, պարզ է դառնում, որ պատկերը հուսադրող չէ։
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ