HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Մարտունեցիներն ընդդեմ հէկի. եպիսկոպոսի եղբայրը կհանդիպի բնակիչներին

Գեղարքունիքի մարզի Մարտունի համայնքի բնակիչները երեկ բարձրաձայնել են իրենց համայնքում գործող հէկի բնապահպանական խնդիրների մասին և սպառնացել են փակել հէկի ջուրը: Սակայն նրանք դեռևս իրականություն չեն դարձրել սպառնալիքը, քանի որ, Մարտունու համայնքի ղեկավար Արմեն Ավետիսյանը «Հետք»-ի հետ զրույցում ասաց, որ հէկի տերը՝ եղեգնաձորցի Մայիս Մկրտչյանը խոստացել է երկուշաբթի այցելել համայնքապետարան և բնակիչների ու համայնքապետի հետ քննարկել բնակիչներին հուզող հարցերը:

Մարտունի գետի վրա 2011 թվականից «ՄԿՇԳ էներգիա» ՍՊԸ-ն շահագործում է 1800 կՎտ հզորություն ունեցող «Մարտունի» փոքր հէկը:  

2007-ին ստեղծված «ՄԿՇԳ էներգիա» ՍՊԸ-ն ղեկավարում է Վայոց ձորի թեմի առաջնորդ Տեր Աբրահամ եպիսկոպոս Մկրտչյանի եղբայրը: Նա, համաձայն ՀՀ ԱՆ պետական ռեգիստրի տվյլաների, պաշտոնապես նաև ընկերության տնօրենն է, սակայն բաժնետեր է երևանաբնակ Սերգեյ Արտաշեսի Ալեքսանյանը:  

Վայոց ձորի մարզում եպիսկոպոսի հէկերին արդեն անդրադարձել ենք: Մկրտչյանների ընտանիքը Վայոց ձորի մարզում հէկեր շահագործելու մեծ փորձ ունի: Նրանք, ըստ ամենայնի, ընդլայնել են հէկերի բիզնեսի աշխարհագրությունը և անցել Գեղարքունիքի մարզ:

Մարտունի գետը Սևանա լճի ավազանի գետերից է, սկիզբ է առնում Վարդենիսի լեռնաշղթայի հյուսիսային լանջերից: Երկարությունը 27,6 կմ է: Համաձայն Հանրային ծառայությունները կարգավորող հանձնաժողովի՝ «Մարտունի» փոքր հէկը համանուն գետի վրա գործող միակ հէկն է:

Համայնքի ղեկավար Արմեն Ավետիսյանը պատմեց, որ հէկի սեփականատերերը բնակիչներին բանավոր խոստումներ են տվել՝ կփոխհատուցեն իրենց էլեկտրաէներգիայի գումարները, սակայն այդ խոստումներն իրականություն չեն դարձել: Բացի դրանից, հէկ շահագործողներն օգտագործել են որոշ սեփականատերերի հողերը և որևէ փոխհատուցում չեն տվել:

«Հէկն ինքն իրեն վնաս է ներկայացնում: Դուք չգիտե՞ք, որ հէկը կառուցելուց ձկան հերը անիծեցին, անասունները, էդքան տեղն արդեն փակ է, չեն կարող օգտագործել: Եթե գետն ամբողջությամբ տրուբաներով գնում է, գետը կարո՞ղ են օգտագործել, ձուկը կարո՞ղ է աճել, կենդանական աշխարհը կարո՞ղ է գոյություն ունենալ»,- ասաց Արմեն Ավետիսյանը՝ պատասխանելով մեր հարցին, թե կոնկրետ բնապահպանական ինչ խնդիրներ են առանձնացնում բնակիչները:

Ջրաչափ հէկի օգտագործած ջրահոսքի վրա տեղադրված չէ, հետևաբար, համայնքապետն ասում է, որ հնարավոր չէ վերահսկել բնապահպանական թողքը:

Այս և բնակիչներին հուզող հարցերի պատասխանները հույս ունեն ստանալ Մայիս Մկրտչյանից՝ նախատեսված հանդիպման ժամանակ:

Հիշեցնենք, որ նույն մարզի Վարդենիկ համայնքի բնակիչներն էլ մայիսի 2-ին փակել էին ՀՀԿ-ական պատգամավոր Հակոբ Հակոբյանի ընտանիքին պատկանող հէկի ջուրը: Նրանք պահանջում էին, որ պատգամավորը քվեարկի վարչապետի ժողովրդի թեկնածուի օգտին և լուծի համայնքում հէկի պատճառով առաջացած բնապահպանական հարցերը: 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter