Արդեն երկրորդ օրն է, ինչ Արցախի Շահումյանի (Քարվաճառի) շրջանում փոքր հէկերի ընթացող շինարարական աշխատանքները դադարեցնելու պահանջով իր տան բակում հացադուլ է հայտարարել Քարվաճառ քաղաքի բնակիչ Ալեքսանդր Քանանյանը: 

«Հետքը» զրուցել է Ա. Քանանյանի հետ:

Պարոն Քանանյան, երեկ լուրեր կային, որ Քարվաճառի դպրոցականները դասադուլ պիտի հայտարարեն՝ ի աջակցություն Ձեզ: 

Երեխեքը մեծ համարձակություն արեցին՝ դուրս եկան: Տնօրենին պահանջագիր ներկայացրին, որ միանում են Քարվաճառի հէկերի շինարարությունն արգելելու պահանջին: Երեկոյան, երբ տարածվել է տեղեկատվություն, որ Կառավարությունը ժամանակավորապես կասեցրել է հեկերի շինարարությունը, նրանք որոշել են դադարեցնել դասադուլը: Հիմա պետք է բանակցություն լինի:

Շինարարական աշխատանքները, փաստորեն, կասեցրե՞լ են:

Ըստ Արցախի կառավարության հավաստիումների՝ կասեցված են: Ես մարդկայնորեն վստահում եմ պետնախարարին, բայց չեմ վստահում հէկ կառուցող օլիգարխներին: Ես նախ պետք է համոզվեմ, որ բոլոր ապօրինի հէկերի շինարարության գոտիներում ապօրինի աշխատանքները դադարեցված են: 

Այսօ՞ր պիտի համոզվեք:

Ինձ համար հարմար ժամկետում, առանց հացադուլից դուրս գալու: Եթե համոզվեմ, որ իրոք բոլոր աշխատանքները դադարեցված են, նոր դրանից հետո կգամ Ստեփանակերտ և պետնախարարի հետ կքննարկեմ համապաստախան անկախ ներկայացուցչական հանձնաժողով ստեղծելու եղանակը. ինչպես է ձևավորվելու, ինչ լիազորություններով և ինչ կազմով: Եվ անպայման այդ հանձնաժողովը պետք է ունենա բաց մատչելիություն դեպի ոչ միայն բոլոր հէկերի շինարարության տարածքներ, այլև պետք է բաց լինեն այդ հէկերի նախագծերի հիմքում եղած ֆինանսական փաստաթղթերը, որպեսզի պարզ լինի, թե ինչ ֆինանսավորման եղանակներով է այս ամենը տեղի ունեցել. իրական սեփականատերերի անունները և այլն: