Հայաստանի արտաքին գործերի նախարար Արարատ Միրզոյանը խորհրդարանում` արտաքին հարաբերությունների մշտական հանձնաժողովում անդրադարձավ Անթալիայի ֆորումի ժամանակ իր և Թուրքիայի արտգործնախարար Մևլութ Չավուշօղլուի հետ հանդիպմանը:

«Մեր հանդիպմանը երկուստեք կարևորվել է կարգավորման գործընթացի հետագա ընթացքը, և երկու կողմերն էլ հանդիպման ընթացքում վերահաստատել են, որ պատրաստակամություն ունեն այս գործընթացն առանց նախապայմանների տանել առաջ, պսակել այն հարաբերությունների հաստատմամբ և երկրների միջև սահմանների բացմամբ»,-ասաց Արարատ Միրզոյանը:

Պատգամավորներին ամենից շատ հետաքրքրում էր, թե ինչու է Հայաստանի ԱԳ նախարարը ժպտացել Չավուշօղլուի հետ հանդիպման ընթացքում: «Հայաստան» խմբակցության պատգամավոր Գեղամ Նազարյանը, մասնավորապես, հարցրեց, թե նախարարն այդ ժպիտով ինչ էր ուզում փոխանցել զոհվածների ծնողներին:

Հայաստանի արտաքին գերատեսչության ղեկավարն արձագանքեց` նմանատիպ բոլոր հանդիպումներում դիվանագետների դեմքերին ժպիտ էլինում: Ապա հավելեց`դեռևս 2018-ի հեղափոխությունից առաջ Հայաստանի անունից բանակցողները, Հայաստանի ղեկավարները շատ ավելի լայն էին ժպտում նման հանդիպումների ժամանակ:

«Եթե ձեր ասածի տրամաբանության կոնտեքստում դիտարկենք, էդ ժամանակ պետք է վերաբերմունք ձևավորված լիներ առաջին պատերազմի ընթացքում զոհերի ծնողների նկատմամբ: Չպետք է կորելացիա փնտրել էդպիսի հանդիպումներում ժպիտների և զոհվածների ծնողների և որևէ մեկի նկատմամբ մեր  վերաբերմունքի միջև: Կարող եմ հավելել միայն, որ պատրաստ եմ խստորեն քննադատվել իմ ամեն մի ժպիտի և արտահայտության համար, որոնք կօգնեն խուսափել ապագայի գեթ մեկ զոհից` անցյալի բոլոր զոհերի նկատմամբ ողջ հարգանքով հանդերձ»,-ասաց նա:

Միրզոյանը վստահեցրեց, որ երբ էլ մեկնարկեն Հայաստանի ու Ադրբեջանի միջև սահմանազատման ու սահմանագծման աշխատանքները,  դրանք որևէ կապ չունեն ԼՂ կարգավիճակի կամ հայության իրավունքների հետ:

«Ուղղակի սահմանագծվելու է Հայաստանի ու Ադրբեջանի միջև սահմանը: Այս բոլոր տարիների ընթացքում ՀՀ-ն հայտարարել է, որ ԼՂ հարցը տարածքային հարց չէ, բոլոր իրավունքների հարց է: Մենք շարունակում ենք հարցը դիտարկել այս համատեքստում և մեր ջանքերն ուղղված են լինելու դրան»,-ասաց Միրզոյանը:

ԱԳ նախարարն ընդգծեց` Հայաստանի իշխանությունների համար սկզբունքային ու առանցքային է արցախահայության իրավունքների և Լեռնային Ղարաբաղի կարգավիճակի հարցը:

Ինչ վերաբերում է ադրբեջանական կողմի առաջ քաշած հինգ կետերին՝ բանակցությունները սկսելու և խաղաղության պայմանագիր հաստատելու համար, Միրզոյանն ասաց. «Մեր ընկալումն այն է, որ մեզ փոխանցված ադրբեջանական առաջարկներում, մեծ հաշվով, անընդունելի ոչինչ չկա, այլ բան, որ այդ հարցերն ամբողջապես չեն հասցեագրում Հայաստան-Ադրբեջան համապարփակ խաղաղության հնարավոր օրակարգը, և ահա մեր պատասխանները եկել են ամբողջացնելու այս օրակարգը (նկատի ունի Արմենպրեսին տված իր հարցազրույցը): Մեր պատասխաններում առանցքային ենք համարում ԼՂ հայության իրավունքները և ԼՂ կարգավիճակի հարցի հասցեագրումը։ Ահա այս ամբողջական հենքի վրա մենք պատրաստ ենք սկսել բանակցություններ և հենց այս առաջարկով էլ դիմել ենք ԵԱՀԿ Մինսկի խմբի համանախագահությանը»: