Տեսանյութեր
Լուսանկարներ
Կարմիր խաչի ներկայացուցիչներն այցելել են Բաքվում պահվող Արցախի պաշտոնյաներին
2024 թվականի փետրվարի վերջին Կարմիր խաչի միջազգային կոմիտեի (ԿԽՄԿ) ներկայացուցիչներն այցելել են ադրբեջանական գերության մեջ գտնվող Արցախի պաշտոնյաներին։ Այս մասին հայտնում են ադրբեջանկան լրատվամիջոցները՝ հղում անելով Կարմիր խաչի ադրբեջանական ներկայացուցչության հանրային կապերի պատասխանատու Իլահա Հուսեյնովային։
Ըստ ԶԼՄ հրապարակումների՝ Բաքվում պահվող Արցախի պաշտոնյաների հետ տեղի են ունեցել առանձնազրույցներ, նաև նրանց հնարավորություն է տրվել շփվել իրենց ընտանիքների հետ։
«Իր մանդատի համաձայն՝ ԿԽՄԿ-ն այդպիսի այցերի ժամանակ գնահատում է պահման պայմանները և վերաբերմունքը կալանավորների նկատմամբ։ Կարմիր խաչը նաև պայմաններ է ստեղծում վերականգնել կամ շարունակել կապը՝ պահվող անձանց և նրանց ընտանիքների միջև։ ԿԽՄԿ ընթացակարգերի համաձայն՝ այցերի հետ կապված դիտարկումները և խորհրդատվությունները փոխանցվում և քննարկվում են միայն պահող կողմի հետ»,- հայտնել է ԿԽՄԿ ադրբեջանական ներկայացուցիչը։
Հիշեցնենք՝ 2023 թվականի սեպտեմբերին Արցախի ամբողջական օկուպացիայից հետո ադրբեջանական ուժայինները ձերբակալել են Արցախի նախկին պետնախարար Ռուբեն Վարդանյանին, Արցախի Հանրապետության երկրորդ, երրորդ և չորրորդ նախագահներ Արկադի Ղուկասյանին, Բակո Սահակյանին, Արայիկ Հարությունյանին, Արցախի ԱԺ նախկին նախագահ Դավիթ Իշխանյանին, նախկին արտգործնախարար Դավիթ Բաբայանին, Պաշտպանության բանակի նախկին հրամանատար Լևոն Մնացականյանին ու ՊԲ հրամանատարի նախկին տեղակալ Դավիթ Մանուկյանին։ Նրանց Ադրբեջանի քրեական օրենսգրքի տարբեր հոդվածներով մեղադրանքներ են առաջադրվել։
Մեկնաբանել