Այսօր՝ ժամը 17։00-ի սահմաններում, 3 քաղաքացի զինված փորձել են ներխուժել ՆԳՆ ոստիկանության Նոր Նորքի բաժնի վարչական շենք, գործադրել են նռնակ, ինչի հետևանքով ներխուժող անձանցից 2 հոգի վիրավորվել են և տեղափոխվել բուժհաստատություն։

Ավելի ուշ վնասազերծվել և բաժին է տեղափոխվել նռնակով զինված երրորդ անձը, որը ՆԳՆ ոստիկանության Նոր Նորքի բաժնի վարչական շենքի դիմաց էր շուրջ 2 ժամ։ Այս մասին հայտնում է հայտնում է Ներքին գործերի նախարարությունը։ 

Առողջապահության նախարարությունը հայտնում է, որ նռնակից վիրավորված երկու քաղաքացիների վիճակը միջին ծանրության է։

ՀՀ ՆԳՆ Ոստիկանության Երևան քաղաքի Նոր Նորք վարչական շրջանի բաժին 3 անձի ներխուժման, սպառնալիքներ հնչեցնելու և պայթյուն կատարելու դեպքի առթիվ ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում նախաձեռնվել է քրեական վարույթ ՀՀ քրեական օրենսգրքի 308-րդ հոդվածի 1-ին մասի (ահաբեկչություն) հատկանիշներով։ Հայտնում է Քննչական կոմիտեն։