Հայ ազգային կոնգրեսը շարունակում է պնդել արտահերթ ընտրությունների անհրաժեշտության մասին` հղում անելով թե’ ներքին, թե’ արտաքին իրավիճակին: Խոսելով արտահերթ ընտրությունների հավանականության մասին` ՀՀԿ պատգամավոր Սուքիաս Ավետիսյանը «Հենարան» ակումբում կայացած մամուլի ասուլիսի ժամանակ նշեց, որ Հայ ազգային կոնգրեսն իր ներսում միշտ էլ պրոբլեմներ գտնում է` արտահերթ ընտրություններ անելու, «որպեսզի իրենց դերակատարումը շեշտեն»: «Ես որևէ այլ հիմք չեմ տեսնում` արտահերթ ընտրությունների համար»,- ասաց նա: ԱԺ ՀՅԴ պատգամավոր Արա Նռանյանն էլ նշեց, որ սա այն դեպքն է, երբ սցենարը հարմարեցվում է ցանկություններին: Իսկ որպեսզի արտահերթ ընտրությունների համար հիմք լինի, ըստ պատգամավորի` պետք է հասարակության մեջ համապատասխան հասունացում տեղի ունենա: «Ինչպես նաև քաղաքական ուժերի այնպիսի վերադասավորում պետք է տեղի ունենա, որը հրատապ դարձնի այդպիսի փոփոխությունները: Այսօր նման վերադասավորում չկա, սակայն գործընթացն ընթանում է և ես կարծում եմ` մինչև ընտրություններ կունենանք բավականին լուրջ վերադասավորումներ»,- ասաց նա: