Անահիտ Բաղդասարյան

ՀՀ Սյունիքի մարզի ընդհանուր իրավասության առաջին ատյանի դատարանի Գորիսի նստավայրում օգոստոսի 6-ին շարունակվեց Գորիսի նախկին քաղաքապետ Սամվել Հարությունյանն ընդդեմ Սյունիքի նախկին մարզպետ Սուրիկ Խաչատրյանի գործով նախնական դատական նիստը:

Նախորդ նախնական դատական նիստին պատասխանող, հակըդդեմ հայցվոր Սուրիկ Խաչատրյանի ներկայացուցիչ Մարտին Զիլֆուղարյանը դատարանին դիմում էր ներկայացրել, որով խնդրել էր նախնական դատական նիստ նշանակել մեկ այլ օր և ավելացրել, որ հաջորդ դատական նիստում գրավոր ապացույցներ կներկայացնի:   Ս. Խաչատրյանի ներկայացուցիչն այս անգամ ևս հանդես եկավ նույն խնդրանքով՝ պատճառաբանելով, որ դեռ չի ստացել Սյունիքի մարզի դատախազություն ներկայացրած հարցման պատասխանը, որն էլ պետք է լինի իր խոստացած ապացույցը, որով կհաստատվի Ս. Խաչատրյանի անմեղությունը: Նա դատարանին ներկայացրեց գրության պատճեն և անդորագիրը:

Դատարանն ընդունեց միջնորդությունը և հետաձգեց դատական նիստը:

Հիշեցնենք, որ  Ս. Հարությունյանը դիմել է դատարան՝ խնդրելով պարտավորեցնել Սուրիկ Խաչատրյանին shamshyan.com լրատվական կայքի միջոցով ներողություն խնդրել` տարբեր լրատվամիջոցներում հրապարակված հարցազրույցներում իրեն «հոգեկան հիվանդ» անվանելու համար և փոխհատուցել նվազագույն աշխատավարձի 1000-ապատիկի չափով:

Նույն օրը տեղի ունեցավ նաև Սամվել Հարությունյանն ընդդեմ Սուրեն Բաղդասարյանի դատական նիստը: Դատական նիստը քննվեց հայցվոր Ս. Հարությունյանի բացակայությամբ:

Նշված գործով հայցվոր Ս. Հարությունյանը պահանջում է իր պատիվն ու արժանապատվությունը «Ո՞վ ես, ի՞նչ մարդ ես, որ կուսակցությունից ես» հոդվածով զրպատությամբ արատավորելու համար lurer.com լրատվական կայքի միջոցով հրապարակայնորեն զրպատություն համարվող փաստացի տվյալները հերքել և ներողություն խնդրել, պատասխանողից իր օգտին բռնագանձել սահմանված նվազագույն աշխատավարձի 2000-ապատիկի չափով փոխհատուցման գումար՝ զրպարտության միջոցով իր պատիվն ու արժանապատվությունը արատավորելու համար և նվազագույն աշխատավարձի 1000-ապատիկի չափով փոխհատուցման գումար՝ վիրավորանքի միջոցով իր պատիվն ու արժանապատվությունը արատավորելու համար:

Սուրեն Բաղդասարյանի ներկայացուցիչ Մարտին Զիլֆուղարյանը դատարանին հայտնեց, որ ամբողջովին առարկում է ներկայացված պահանջի դեմ. «Մենք հատուկ դիտավորություն, առավել ևս վիրավորելու կամ զրպարտելու միտում չենք ունեցել, քանի որ հարգալից վերաբերմունք ունենք նրա և նրա հարազատների նկատմամբ, պարզապես մեր կարծիքն ենք հայտնել իր կատարած գործունեության, այդ թվում նաև իր վարքագծի վերաբերյալ: Նույնիսկ հոդվածի հարցադրման տեսքով շարադրված վերնագիրն արդեն ասում է, որ դա զրպարտություն կամ վիրավորանք չէ»,- ասաց Մ. Զիլֆուղարյանը: 

Սուրեն Բաղդասարյանի ներկայացուցիչը դատարանին էր ներկայացրել Սուրեն Բաղդասարյանի և Վլադիմիր Վարդանյանի հայտարարությունները: «Դատարանին ներկայացրած Սուրեն Բաղդասարյանի հայտարարության մեջ կան հայցվորի կողմից նշված բոլոր հարցերի պատասխանները: Այն  հանդիսանում է գնահատողական դատողություն եւ համապատասխանում է իրականությանը. դա կարող են հաստատել բազմաթիվ գորիսեցիներ»,- նշեց Մ. Զիլֆուղարյանը:

Դատավոր Մ. Հովակիմյանը Ս. Բաղդասարյանի ներկայացուցիչ Մ. Զիլֆուղարյանին մի քանի հարցեր տալուց հետո, գործի քննությունը համարեց ավարտված, ապացույցները հետազոտված եւ հայտարարեց, որ վճիռը կհրապարակվի օգոստոսի 12-ին: